ԼՂՀ նախագահի ընտրություններին դիտորդական առաքելություն իրականացրած Ռուսաստանի Դաշնության դիտորդական խմբի անդամներն այսօր հանդես եկան հայտարարությամբ, որում բարձր են գնահատում ընտրությունների անցկացման գործընթացը: ՌԴ-ից Արցախի ընտրություններին դիտորդական առաքելություն է իրականացրել 16 հոգանոց պատվիրակությունը:
Ռուս դիտորդները նշեցին, որ շրջայց են կատարել երկրի տարբեր բնակավայրերում տեղակայված ընտրական տեղամասեր: Դիտորդներին հնարավորություն է ընձեռվել ծանոթանալու Արցախի Կենտրոնական ընտրական հանձնաժողովի և ընտրական տեղամասերի աշխատանքին, մասնակցելու ձայների հաշվարկման գործընթացին:
Ռուս դիտորդներն արձանագրեցին, որ ԼՂՀ նախագահական ընտրություններն անցան քաղաքական բարձր մրցակցության պայմաններում, հասանելի զանգվածային լրատվամիջոցների համար: Ընտրական տեղամասերում արձանագրված մի քանի թերությունները, ըստ նրանց, ընդամենը տեխնիկական բնույթ էին կրում:
ՌԴ Պետդումայի պատգամավոր Ալեքսանդր Բալբերովը նշեց, որ ընտրողները քվեարկեցին իրենց կամքով, ոչ մի խախտում չարձանագրվեց, որը կարող էր փաստել մարդկանց ազատ տեղաշարժը սահմանափակելու մասին:
«Ռուսական դիտորդական առաքելությունը ԼՂՀ նախագահի ընտրությունները համարում է կայացած, թափանցիկ, լեգիտիմ, ազատ, ժողովրդավար, արդար, երկրի ընտրական օրենսդրությանը լիովին համապատասխան: Ընտրությունները համապատասխանում են նաև ժողովրդավար ընտրությունների անցկացման միջազգային չափանիշներին: Դիտորդական խմբի անդամներն ընդգծում են ընտրությունների մեծ դերակատարությունը Մինսկի խմբի բանակցային գործընթացում:
Ժողովրդավար ընտրական գործընթացի կառուցմանն ու կատարելագործմանն ուղղված ջանքերը համապատասխան ուշադրություն են պահանջում ԵԱՀԿ Մինսկի խմբի կողմից, միջազգային հանրությունից, ինչը կնպաստի հայ-ադրբեջանական հիմնախնդրի խաղաղ լուծման արագացմանը` ուղղված տարածաշրջանում կայունության և խաղաղության հաստատմանը»,- ռուս դիտորդների անունից հայտարարեց Ալեքսանդր Բալբերովը:
Լուսանկարը՝ PanARMENIAN Photo-ի
