Աշխարհում խոշորագույն YouTube վիդեոհոսթինգը գործարկել է տեսանյութերում դեմքերը «աղավաղելու» գործիք, որը քաղաքացիական բողոքի ակցիաների մասնակիցներին թույլ կտա անճանաչելի լինել: Այս մասին ասված է YouTube-ի պաշտոնական բլոգում:
«Հասարակ մարդիկ կարևոր դեր են խաղում՝ հաղորդելով նորությունների մասին և աշխարհում տեղի ունեցող իրադարձությունների վերաբերյալ տեսանյութեր տեղադրելով»,-նշվում է բլոգում: Witness իրավապաշտպան կազմակերպության տվյալներով՝ կայքերի մեծամասնությունը օգտատերերին հնարավորություն չի տալիս ծածկել տեսանյութի մասնակիցների դեմքերը:
«Եթե դուք ցանկանում եք ցույցի նկարահանումը տեղադրել առանց դեմքերի բացահայտման կամ ցուցադրել 8 տարեկանում ձեր հաղթական գոլի տեսանյութը՝ առանց մյուս երեխաների դեմքերը ցուցադրելու, ապա YouTube-ում գործարկվող այս տեխնոլոգիան դրանց ապահովման առաջին քայլն է»,-ասված է բլոգում:
Նոր գործառույթը հասանելի է YouTube-ի տեսանյութերի խմբագրման համար լրացուցիչ գործառույթների փաթեթում:
YouTube-ում տեսանյութերը տեղադրվում են կամովին, այդ իսկ պատճառով օգտատերերը անձամբ են պատասխանատվություն կրում տեղադրված նյութի գաղտնիության համար: Վիդեոհոսթինգը մշակողները հույս են հայտնել, որ նոր գործառույթը օգտատերերին թույլ կտա իրենց զգալ ավելի ազատ` տեսանյութը հանրությանը հասանելի դարձնելու ժամանակ:
Google ընկերությունը, որին է պատկանում YouTube վիդեոհոսթինգը, նախկինում ստիպված է եղել կիրառել տեխնոլոգիան եվրոպական մի քանի երկրների իշխանությունների դիմումների հիման վրա: Ընկերությունը նոր տեխնոլոգիայի միջոցով աղավաղել է Google Street View-ի պատկերներում երևացող ավտոմեքենաների պետհամարանիշները, մարդկանց դեմքերը և այլն:
