«Թալիբան» ծայրահեղական շարժման զինյալները երեկ երկու անգամ հարձակում են գործել Աֆղանստանի Վարդակ մարզի տեղական կառավարման գործերով անկախ վարչության ղեկավարության ավտոշարասյան վրա: Տեղի Pajhwok գործակալության հաղորդմամբ՝ հարձակման հետևանքով պաշտոնյաներից ոչ ոք չի տուժել:
Հարձակումն իրականացվել է Սաիդաբադ շրջանում՝ Քանդահար և Քաբուլ քաղաքները կապող մայրուղու վրա: Հաղորդվում է, որ Ղազնի մարզից դուրս եկած և Վարդակ շարժվող ավտոշարասյունը հարձակման է ենթարկվել նռնականետերով և ականանետերով: Ավտոշարասյունն ուղեկցող ոստիկանները մարտի մեջ են մտել զինյալների հետ: Պաշտոնյաներն այդ ընթացքում հեռացել են դեպքի վայրից: Սակայն 5 կմ հեռանալով՝ նրանք դարձյալ հարձակման են ենթարկվել:
Հանձնաժողովի ղեկավար Ֆարիդ Մումունզայը հայտնել է, որ ավտոմեքենաները խիստ վնասվել են, սակայն տուժածներ չկան:
