Ջավախքում հիմնախնդիրներ միշտ են եղել, սակայն Հայաստանի և Վրաստանի ջերմ հարաբերությունների արդյունքում դրանց պարբերաբար լուծումներ են տրվում: Այսօր տեղի ունեցած մամուլի ասուլիսի ժամանակ այս մասին ասաց ԱԺ նախկին պատգամավոր, ծնունդով ջավախքցի Հայկ Սանոսյանը:
«Փառք Աստծո, մեր երկրների միջև լավ հարաբերություններ են հաստատված, ինչի շնորհիվ էլ խնդիրները լուծում են գտնում: Դրա վառ ապացույցը Վրաստանում Հայ առաքելական եկեղեցուն իրավական կարգավիճակ տալն էր: Նույն կերպ պետք է լուծել նաև հայոց լեզվի խնդիրը: Պարզապես մենք չպետք է սրենք իրավիճակը, այլ պայքարենք ու ճանապարհներ հարթենք հարցերի լուծման համար: Իհարկե, ամեն ինչ անթերի չէ, բայց պետք է անել ամեն բան՝ ընթացքում լուծելու առկա բոլոր խնդիրները»,- ասաց նա:
ԱԺ նախկին պատգամավորը կողմնակից է վիրահայերի՝ վրացերենի իմացությանը: «Միաժամանակ, խիստ դեմ եմ, որ հայ մեծանուն բանաստեղծ Վահան Տերյանի հոբելյանական միջոցառումներն անցկացվում են ռուսերենով և դրանց ժամանակ քաղաքական կոչեր են հնչում»,- ասաց նա:
Հայկ Սանոսյանի խոսքով՝ իր եղբայրներն իրենց անձնական օրինակով Ջավախքում ներդրումներ անելով և 7-8 հարյուր աշխատատեղ ստեղծելով՝ նպաստում են ջավախքցիների՝ հայրենիքից չհեռանալու գործին:
«Նրանք կայացած բիզնեսմեններ են, թողել են Ռուսաստանի նման հրաշք երկիրն ու եկել են Ջավախք՝ իրենց բիզնեսն այնտեղ ծավալելու: Իմ երկու տղաներն էլ, մեկը՝ 20 տարեկան, մյուսը՝ 17, ևս ապրում ու արարում են Ջավախքում»,- ասաց նա:
Անդրադառնալով աշնանը Վրաստանում կայանալիք խորհրդարանական ընտրություններին՝ Սանոսյանը վստահություն հայտնեց, որ կհաղթեն գործող իշխանությունները:
«Առաջին լրատվական»-ի հարցին՝ ո՞ւմ է պաշտպանում վիրահայ համայնքը՝ իշխանությա՞նը, թե՞ ընդդիմությանը, նախկին պատգամավորը պատասխանեց. «Տոկոսային հարաբերությամբ հայերը իշխանական դաշտում են՝ չնայած քիչ չեն նաև ընդդիմության կողմնակիցները»:
Ամփոփելով՝ Հայկ Սանոսյանն ընդգծեց, որ անվերապահորեն հավատում է Հայաստանում մայիսի 6-ին կայացած խորհրդարանական ընտրությունների արդյունքներին, իսկ նախագահական ընտրություններին սատարելու է Սերժ Սարգսյանին:
