Նավթային արդյունաբերության ոչ մի ղեկավար չունի այնքան ազդեցություն, ոչ մի ղեկավար չի կնքել այնքան գործարքներ ու «այդքան թևեր չի ոլորել», որքան Ռուսաստանի նախագահ Վլադիմիր Պուտինը. պնդում է Forbes-ի մամուլի տեսաբան Քրիստոֆեր Հելմենը:
Այս եզրակացությանն է նա հանգել` վերլուծելով ամբողջ աշխարհի 25 խոշորագույն նավթային ընկերությունների ցուցակը:
«Գազպրոմն» ու «Ռոսնևտը», որոնց վերահսկիչ փաթեթը պատկանում է պետությանը, արդյունահանման ծավալներով գրավում են 2-րդ ու 15-րդ տեղերը՝ համապատասխանաբար:
«2006թ. Forbes-ն առաջին անգամ ուսումնասիրեց, թե ինչպես է Պուտինն օգտագործում «Գազպրոմը»` որպես քաղաքական գործիք: Այդ ժամանակից ի վեր Պուտինի իշխանությունը այդ ընկերության վրա, որը գրեթե մենաշնորհի կարգավիճակում է Արևմտյան Եվրոպայում, միայն ամրապնդվել է»,- գրում է հեղինակը: Նույնն է իրավիճակը «Ռոսնևտում», որի ղեկավար վերջերս Պուտինը նշանակեց Իգոր Սեչինին:
Հոդվածագրի կարծիքով`Պուտինը ազդեցություն ունի նաև «ԼուկՕյլի» վրա (ցուցակում 18-րդ հորիզոնականը)՝ չնայած, որ այն մասնավոր ընկերություն է: «ԼուկՕյլի» հիմնադիր Վագիթ Ալեքպերովը «պարբերաբար խորհրդակցում է Պուտինի հետ»,- նշվում է հոդվածում:
«Բայց Պուտինի ձգողական ուժը ձգում է նավթային այլ հսկաների ևս»,- գրում է հեղինակը` հիշեցնելով Royal Dutch Shell-ի (7-րդ հորիզոնական) համագործակցությունը «Գազպրոմի» հետ ու Exxon Mobil-ի (4-րդ հորիզոնական) գործարքը «Ռոսնևտի» հետ:
BP-ն (6-րդ հորիզոնական) փորձում էր կնքել նմանատիպ գործարք, սակայն ռուս օլօգարխները խոչընդոտեցին դրան: «Ռոսնևտը» պայմանավորվեց համագործակցել Statoil-ի (20) ու Eni-ի (19) հետ:
Պուտինն ունի (կամ ունեցել է) նաև «նավթով հարուստ ընկեր-բռնակալներ», ինչպես արտահայտվում է հոդվածագիրը՝ Քադաֆին ու Չավեսը: Ի դեպ, Petroleos de Venezuela-ն ցուցակի 22-րդ հորիզոնականում է:
Ռուսաստանը մրցակցում է սաուդյան Aramco-ի (1-ին հորիզոնական) հետ՝ գնորդների համար, սակայն 2011թ. Պուտինն ասաց, որ Ռուսաստանն իր գործողությունները պետք է համաձայնեցնի OPEC-ի հետ, ասվում է հոդվածում:
5 տարի առաջ Պուտինը ապարդյուն փորձում էր համոզել Qatar Petroleum-ին (17) ու National Iranian Oil Company (3)-ին ստեղծել «գազային OPEC»: Այդ ժամանակից ի վեր համաշխարհային գազային շուկան փոխվեց շնորհիվ ԱՄՆ թերթաքարային գազի բումի:
«Թերթաքարային գազային հեղափոխությունը» Պուտինի` վառելիքաէներգետիկ ոլորտի վրա ունեցած իշխանության գլխավոր սպառնալիքն է՝ եզրակացնում է հեղինակը:
«Գազպրոմը» ևս մեկ ահռելի մրցակից կունենա, թեև ամերիկացիները որոշել են ստեղծել հեղուկ գազի արտահանման ենթակառուցվածք:
«Զարմանալի չէ, որ Պուտինը ու նրա ընկերները վատ են արտահայտվում թերթաքարային գազի մասին»,- հավելում է հեղինակը:
Russia Today հեռուստաալիքը (Կրեմլի քարոզչական հսկայական ստորաբաժանումը` ըստ հեղինակի) ցուցադրել է «միակողմանի» շարք, ըստ տեսաբանի՝ սյուժեներ թերթաքարային գազի ֆրեկինգ արդյունահանման հիմնական մեթոդի դեմ:
«Տեսնենք, թե ինչպես կփոխվի նրանց տոնը, երբ Exxon-ն ու Statoil-ը ֆրեկինգով զբաղվեն Սիբիրում: Մի՛ հավատացեք, որ Պուտինը թույլ կտա, որ ֆրեկինգի դեմ բողոքները սպառնան «Գազպրոմի » ու «Ռոսնևտի» անդամակցությանը 25 խոշորագույն նավթային ընկերությունների ցուցակում», – խոսքը եզրափակում է Քրիստոֆեր Հելմենը:
