Իսրայելի ռազմական հետախուզության ղեկավար գեներալ մայոր Ավիվ Կոխավին ելույթ ունենալով Կնեսետի պատգամավորների առաջ, անհանգստություն է հայտնել՝ կապված Սիրիայում Բաշար Ալ-Ասադի վարչակարգի տապալումից հետո առաջ եկող հնարավոր զարգացումների հետ:
Ինչպես հաղորդում է Haaretz-ը, Կոխավիի խոսքերով՝ Սիրիայի ներկա իշխանություններն արդեն չեն կարող հաղթել քաղաքացիական պատերազմը, չնայած Ասադի վաչակարգն ի վիճակի է դիմանալ ևս երկու կամ երեք ամիս: Հետախույզը նշել է, որ նրա տապալումից հետո Գոլանի բարձրունքների շրջանը կարող է նմանվել Սինայի թերակղզուն՝ վերածվելով հակաիսրայելական ահաբեկչական ակտիվության գոտու:
Կոխավին պատգամավորներին ցույց է տվել արբանյակային լուսանկարներ, որոնցում երևում է, որ սիրիայի հրետանին անկանոն կերպով ռմբակոծւմ է տարբեր քաղաքների թաղամասեր: նրա խոսքերով՝ դա վկայում է իշխանությունների հուսալքության և այլ՝ առավել մեղմ միջոցներով ապստամբությունը ճնշելու լիակատար անկարողության մասին:
Այդ պայմաններում, գեներալը նշել է, որ Սիրիայում ամեն շաբաթ զոհվում է 500-700 մարդ, իսկ հակամարտությունը թևակոխել է «իրաքացման» փուլ: Նրա տվյալներով՝ Սիրիայի կողմից ուղղակի հարձակման վտանգ դեռևս չկա, քանի որ Ասադը Գոլանի բարձունքներից զորքերը հետ է քաշել երկրի ներքին շրջաններ՝ ապստամբությունը ճնշելու համար:
Կոխավին նաև հայտարարել է, որ Իսրայելը պետք է ձևավորի վարքի դրսևորման ռազմավարություն՝ Սիրիայի վարչակարգի հնարավոր տապալման դեպքում: Նրա խոսքերով՝ Իրանը և «Հըզբոլլահ» շարժումն արդեն ակտիվորեն նման ծրագրեր են մշակում:
Իսրայելը և Սիրիան ֆորմալ կերպով գտնվում են պատերազմային վիճակում, սակայն ակտիվ ռազմական գործողություններ երկու երկրների միջև չեն ծավալվում արդեն երկար ժամանակ:
