Հայաստանի տեղեկատվական տեխնոլոգիաների (ՏՏ) ոլորտը տնտեսության այն ճյուղն է, որ ամեն տարի հսկայական աճ է գրանցում։ Նույնիսկ ճգնաժամի տարիներին աճի տեմպերը չդանդաղեցին։ D-Link ընկերության հայաստանյան ներկայացուցչության ղեկավար Արմեն Շահնազարյանի հետ զրուցում ենք ՏՏ ոլորտի խնդիրների վերաբերյալ։
– Պարոն Շահնազարյան, տեղեկատվական տեխնոլոգիաների ոլորտը շարունակում է աճի տեմպեր արձանագրել: Արդյոք դա բավարա՞ր է ներկայիս մարտահրավերներին դիմակայելու համար, և այդ առումով ի՞նչ է անհրաժեշտ անել:
– Զարգացման տեմպերն ընդհանուր առմամբ, իհարկե, բավարար չեն։ Ունենք այն, ինչ ունենք։ Ավելին կարող էինք ունենալ, եթե լիներ շատ ավելի հստակ պետական քաղաքականություն։ Այն, ինչ այսօր ունենք, անհատ ձեռներեցների, տարբեր կազմակերպությունների ջանքերի արդյունք է։
– Պարբերաբար խոսվում է ոլորտի համախմբվածության մասին, շեշտվում է, որ այն կոնսոլիդացված է: Ոլորտում կա՞ն արդյոք ձեռքբերումներ այդ համախմբվածության շնորհիվ:
– Համենայնդեպս, վերջին տարիներին ՏՏ ոլորտի ձեռքբերումները միանշանակ համախմբվածության արդյունք են։ Կայացած և շուկայում հստակ դեր ունեցող ձեռնարկություններն այդ համախմբվածության արդյունքում շատ մեծ աջակցություն են ցուցաբերում նորաստեղծ ընկերություններին և ընդհանրապես ՏՏ ոլորտին։ Վերջին տարիներին ՏՏ համայնքի հստակ ուղղորդված ծրագրերն օգնում են զարգացմանը։ Ընդ որում, սա` այն դեպքում, երբ ընդամենը մի քանի տարի առաջ ՏՏ համայնք գոյություն չուներ։ Եվ եթե չլիներ տեղեկատվական տեխնոլոգիաների կազմակերպությունների ու մասնագետների համախմբվածությունը, մենք կունենայինք այն նույն իրավիճակը, որն ունենք շատ ուրիշ ոլորտներում, որտեղ ամեն մի ձեռնարկություն իր ներդրումների հաշվին ինչ-ինչ բաների հասնում է, սակայն ոլորտի ընդհանուր զարգացման մասին խոսել հնարավոր չէ։
– Ոլորտում գործող կառույցները, ըստ Ձեզ, որքանո՞վ են կատարում իրենց վերապահված գործառույթները։
– Իմ կարծիքով՝ մի բան էլ ավելին են կատարում։ Ձեռնարկությունների ինկուբատոր հիմնադրամը նախապես մշակված ծրագրի հիման վրա ստեղծված կառույց է, որն իր գործառույթները, իմ կարծիքով, հստակ կատարում է։ Նրա գործունեությունը շատ բարձր են գնահատում նաև միջազգային կազմակերպությունները։ Եթե աշխատանքի արդյունավետությունն ակնառու չլիներ, ո՛չ «Մայքրոսոֆթ»-ը, ո՛չ D-Link-ը, ո՛չ էլ այլ խոշորագույն ընկերություններ իրենց ծրագրերը Հայաստանում չէին իրականացնի։ Ինչ վերաբերում է Ինֆորմացիոն տեխնոլոգիաների ձեռնարկությունների միությանը (ԻՏՁՄ), ապա այն հասարակական կազմակերպություն է, ստեղծվել է ոլորտի ձեռնարկություններին աջակցելու նպատակով։ Համենայնդեպս, ես մեր ընկերության անունից կարող եմ վստահեցնել՝ չի եղել դեպք, որևէ գործառույթ, երբեմն նաև ԻՏՁՄ-ի շրջանակներին չվերաբերող, որ մենք աջակցություն չստանանք։ Մինչև վերջ մեր կողքին կանգնել են, մեր խնդիրներն ընդունել են, հասկացել և մեզ հետ լուծել։ Ավելին կարելի է ասել` ԻՏՁՄ-ում ունենք մոտ 60 կազմակերպություն, սակայն ՏՏ ոլորտում բազմաթիվ ընկերություններ կան, որոնք թեև ԻՏՁՄ անդամ չեն, սակայն նույն աջակցությունը ստանում են։ Խնդիրն այստեղ այլ է. մենք բոլորս էլ շատ ավելին ենք ուզում, բոլորս էլ դժգոհ ենք իրավիճակից։ Բայց երբ դժգոհություններդ ինքնանպատակ են և ոչ թե լուծումներ ես փնտրում ու փորձում առաջարկություններ կատարել բարելավման ուղղությամբ, դա արդեն շինծու է և ոչ սրտացավ։
