ԱՄՆ պետքարտուղար Հիլարի Քլինթոնի այցելության դեմ Կահիրեում կազմակերպված բողոքի ակցիայի մասնակիցները երեկ լոլիկներ են նետել բարձրաստիճան ամերիկյան հյուրի շարասյան ուղղությամբ` վանկարկելով. «Մոնիկա՛, Մոնիկա՛, հեռացի՛ր»։ Այս մասին հաղորդում է CNN-ը։
Հիշեցնենք, որ 90-ականների վերջին, երբ Հիլարի Քլինթոնի ամուսինը՝ Բիլ Քլինթոնը, ԱՄՆ նախագահն էր, Սպիտակ տանը ծագել էր սկանդալ Բիլ Քլինթոնի և Սպիտակ տան աշխատակցուհի Մոնիկա Լևինսկու արտաամուսնական կապի հետևանքով։ Ցուցարարները երեկ բողոքի ակցիայի ժամանակ ակնարկել են հենց այս սկանդալի մասին։
Երեկ Քլինթոնը բանակցություններ է վարել երկրի նորընտիր նախագահ Մուհամադ Մուրսիի հետ։ Վերլուծաբանները նշում են, որ սա ամերիկացի բարձրաստիճան պաշտոնյայի առաջին հանդիպումն է «Մուսուլման եղբայրներ»-ի ներկայացուցչի հետ։ Բացի այդ, Քլինթոնը հանդիպել է նաև Զինվորական բարձրագույն խորհրդի ղեկավար մարշալ Տանտաուիի հետ։
