Հուլիսի 12-ին ՀՀ ԱԺ նախագահ Հովիկ Աբրահամյանն ընդունեց ԵԱՀԿ գլխավոր քարտուղար Լամբերտո Զանիերին և նրա գլխավորած պատվիրակությանը:
Ողջունելով պարոն Զանիերի այցը Հայաստան` Հովիկ Աբրահամյանը նշել է, որ մեր երկիրը կարևորում է համագործակցությունը ԵԱՀԿ-ի հետ, ինչպես նաև կազմակերպության աջակցությունը մեր երկրում ընթացող ժողովրդավարական բարեփոխումների գործընթացին: ԱԺ նախագահը բարձր է գնահատել ՀՀ ԱԺ-ԵԱՀԿ արդյունավետ համագործակցությունը տարբեր ձևաչափերով և կարևորել ԵԱՀԿ ԽՎ դերը միջխորհրդարանական երկխոսության զարգացման գործում:
ՀՀ ԱԺ հասարակայնության և տեղեկատվության միջոցների հետ կապերի վարչությունից «Առաջին լրատվական»-ին հայտնում են, որ զրուցակիցները անդրադարձել են Հայաստանում կայացած խորհրդարանական և առաջիկա նախագահական ընտրություններին : ԵԱՀԿ գլխավոր քարտուղարը դրական է գնահատել խորհրդարանական ընտրությունները` նշելով, որ դրանք արժանացել են միջազգային դիտորդների դրական գնահատականին և առաջարկել ԵԱՀԿ խորհրդատվական օժանդակությունը առաջիկա նախագահական ընտրություններում : Հովիկ Աբրահամյանը համոզմունք է հայտնել, որ իշխանություններին կհաջողվի ժողովրդավարական չափանիշներին համապատասխան նախագահական ընտրություններ անցկացնել և նշել, որ մեր երկիրը ակնկալում է միջազգային գործընկերների, այդ թվում նաև ԵԱՀԿ/ԺՀՄԻԳ-ի հետ գործուն համագործակցություն, ինչպես նաև նրանց օժանդակությունը Հայաստանում ժողովրդավարական հաստատությունները և գործընթացները առավել ամրապնդելու գործում:
Անդրադառնալով տարածաշրջանային խնդիրներին` ԵԱՀԿ գլխավոր քարտուղարը շեշտել է, որ ԼՂ հակամարտությունը պետք է կարգավորվի բացառապես խաղաղ բանակցությունների արդյունքում և իր աջակցությունն է հայտնել ԵԱՀԿ Մինսկի խմբի գործունեությանը : Նա խիստ մտահոգություն է հայտնել շփման գծում միջադեպերի կապակցությամբ և անհրաժեշտ համարել դիպուկահարների հետ քաշումը շփման գծից` անթույլատրելի համարելով ուժի կիրառումը և խաղաղ բնակչության նկատմամբ ոտնձգությունները:
ԱԺ նախագահը շեշտել է, որ Հայաստանը կարևորում է Լեռնային Ղարաբաղի հակամարտության կարգավորման գործընթացում ԵԱՀԿ Մինսկի խմբի համանախագահների միջնորդությունը` որպես բանակցային գործընթացի գործուն և միակ ձևաչափ: Նրա խոսքով` մեր երկիրը հետամուտ է խնդրի կարգավորմանը միայն խաղաղ ճանապարհով և կարևորում է տարածաշրջանային խաղաղությունն ու անվտանգությունը: Կողմերը հակամարտությունների կարգավորման խնդրում կարևոր դեր են վերապահել խորհրդարանական դիվանագիտությանը:
Հանդիպմանը քննարկվել են այլ հարցեր ևս:
