Ռուսաստանի և ԱՄՆ-ի դիրքորոշումները Սիրիայի հարցով դարձյալ հեռացել են այն բանից հետո, երբ Ժնևի միջազգային կոնֆերանսում դիրքորշումների որոշակի մոտեցում էր նկատվում,- կարծում են ՄԱԿ-ի դիվանագիտական աղբյուրները:
Ժնևում կողմերը համաձայնության էին եկել Սիրիայի իշխանության փոխանցման հարցում, որով նախատեսվում էր կազմել կոալիցիոն կառավարություն՝ ընդդիմության և իշխանությունների ներկայացուցիչների մասնակցությամբ: Սակայն Սիրիայի հարցով ՄԱԿ-ի ԱԽ նիստի նախօրեին ԱՄՆ-ի և Ռուսաստանի միջև հետագա քայլերի շուրջ դարձյալ տարաձայնություններ են առաջացել:
Ինչպես հաղորդում է Interfax-ը, ՄԱԿ-ի ԱԽ նիստին ակնկալվում է լսել ՄԱԿ-ի հատուկ բանագնաց Քոֆի Անանի զեկույցը ստեղծված իրավիճակի, այդ թվում՝ օրերս Դամասկոս, Թեհրան և Բաղդադ կատարած իր այցերի արդյունքների մասին:
ԱՄՆ պետքարտուղարության պաշտոնական ներկայացուցիչ Պատրիկ Վենտրելը երեքշաբթի հայտարարել է, որ ԱՄՆ-ը ՄԱԿ-ի ԱԽ նիստին կփորձի ընդունել բանաձև, որը կնախատեսի ճնշում գործադրել Սիրիայի իշխանությունների վրա, այդ թվում՝ ՄԱԿ-ի կանոնադրության 7-րդ գլխի համաձայն:
Այս դիրքորոշման հետ համաձայն են ԱՄՆ-ի դաշնակիցները: Արևմտյան դիվանագետներից մեկը մասնավորապես ասել է. «Ի վերջո, անհրաժեշտ է ապահովել իրական ճնշում բոլոր կողմերի վրա: ՄԱԿ-ի ԱԽ-ն պետք է արձագանքի Սիրիայի իրավիճակին ավելի ընդգրկուն մեթոդներով»:
Ռուսական կողմը վճռականորեն դեմ է Սիրիայի իշխանությունների դեմ որևէ պատժամիջոցի, հատկապես ՄԱԿ-ի կանոնադրության 7-րդ գլխի կիրառմանը:
