ԱԺ ՀՀԿ-ական պատգամավոր Շուշան Պետրոսյանի ամուսինն իր ֆեյսբուքյան էջում ցանկություն է հայտնել սառնասրտորեն սատկեցնել ոմանց: Նա մասնավորապես գրել է. « Զզվելի է, իրենց պատմությունն են կերտում՝ ողբերգությունը դրոշակ դարձնելով. սառնասրտորեն կսատկեցնեի ոմանց»:
Այնուհետև մեկնաբանություններում շարունակել է, որ անկարգ եղել են և կան, ստեղծված իրավիճակից էլ առիթավորվում են՝ առանց մտածելու, որ ամենահամբերատար մարդուն էլ կարելի է հունից հանել ու այդ պատճառով «չափալախ ուտել բերնին»:
Ըստ նրա՝ ոստիկաններն այսօր անվտանգության միակ երաշխիքն են: «Պատկերացնու՞մ եք, ոստիկանները չշտկեին ստեղծված իրավիճակը, կքանդեն, կփչացնեն ու նման բաներ, իսկ ինչ պետք է անեն մեր ոստիկանները: Կանգնեն նայե՞ն, ո՛չ: Պետք է սաստեն և պատժեն այդ չգիտեմինչերի անթույլատրելի գործողությունները:
Հարցն ունի տրամաբանական մոտեցում՝ մեղավորները կանգնած են օրենքի առաջ: Պլակատներով աղաղակողների որևէ գործողություն օրինական չէ, հետևաբար՝ պատժելի է օրենքով»,- նշել էր Արման Հարությունյանը՝ շարունակելով, որ հայրը որդու համար պատասխանատվություն չի կրում, ուր մնաց՝ ղեկավարը՝ աշխատողի համար, այն դեպքում, երբ խղճից և մարդասիրությունից դրդված հրաժարվեց իր մանդատից: Նկատենք, որ այս ամենը Շուշան Պետրոսյանի ամուսինը գրել էր անգլատառ և կոնկրետ չէր նշել՝ ինչի մասին է խոսքը:
Հիշեցնենք, որ շաբաթ օրն իր ունեցած մամլո ասուլիսի ընթացքում երգչուհի, պատգամավոր Շուշան Պետրոսյանը, անդրադառնալով «Հարսնաքար» ռեստորանային համալիրում տեղի ունեցած դաժան միջադեպերին, նշել էր Ռուբեն Հայրապետյանն ամենաանկեղծ ելույթն ունեցավ մի քանի օր առաջ: Նա նաև ասել էր, որ տեղի ունեցածը գնահատելու համար գնահատման թիվ չկա: Շուշան Պետրոսյանը դրական էր գնահատել միջադեպից հետո բարձրացված հասարակական աղմուկը:
«Այդ մարդն իր ամենաանկեղծ ելույթն ունեցավ երեք օր առաջ, մենք Տեր Աստված չենք, մենք չենք դատավորները, Աստված ամենավերջին սրիկային անգամ ապաշխարելու հնարավորություն է տալիս, այդ մարդը շատ հուզական հայտարարություն արեց: Եկեք կառչենք և հույս փայփայենք, որ լուսահոգին կլինի վերջինը»,- ցավով ասել էր Շուշան Պետրոսյանը:
Նկատենք նաև, որ այս ամենը նա ասել էր մինչ կիրակի օրը, երբ դեռ տեղի չէր ունեցել ոստիկանության և մոմավառության մասնակիցների միջև բախումը: