Եգիպտոսի նախագահ Մուհամեդ Մուրսին կիրակի օրը հրաման է արձակել Ազգային ժողովի`Եգիպտոսի խորհրդարանի նիստերի վերսկսման մասին, ասվում է պետության ղեկավարի Facebook-ի պաշտոնական էջում:
Նախագահական ընտրություններից երկու օր առաջ Եգիպտոսի սահմանադրական գերագույն դատարանը որոշում էր ընդունել խորհրդարանի ընտրությունների օրենքի և երկրի գլխավոր օրենքի անհամապատախանության մասին: Այդ որոշման հիման վրա էլ եգիպտոսի զինվորականները արձակել էին խորհրդարանը, որում գերակշռում էին իսլամիստները:
Հաղորդագրությունում նշված չէ, թե ինչի հիման վրա է այս որոշումն ընդունվել:
Խորհրդարանի այս կազմը կաշխատի մինչև նոր ընտրություններ: Խորհրդարանական ընտրությունները, համաձայն երկրի նախագահի հրամանի, տեղի կունենան երկրի նոր սահմանադրության և խորհրդարանի մասին նոր օրենքի հաստատումից 60 օր անց:
Սակայն հաշվի առնելով, որ սահմանադրության նոր նախագիծը դեռ չեն մշակել, ներկայիս խորհրդարանը կաշխատի առնվազն կես տարի:
Զինվորականների կողմից արձակված խորհրդարանը առաջին հերթին կառավարվում է իսլամիստների` «Մուսուլման եղբայրներ» ասոցիացիայի Ազատության և արդարության կուսակցության կողմից: Հենց այս կուսակցությունն է Մուրսիին որպես թեկնածու առաջադրել նախագահի պաշտոնին:
