Ադրբեջանական haqqin.az ինտերնետ-պորտալին տված հարցազրույցի ժամանակ Ադրբեջանի հիմնական ընդդիմադիր «Մուսավաթ» կուսակցության նախագահ Իսա Ղամբարը հայտարարել է, որ Ադրբեջանի ներկայիս նախագահ Իլհամ Ալիևն առաջիկա նախագահական ընտրություններում չի առաջադրելու իր թեկնածությունը.
«Ադրբեջանում իշխող ներկայիս ռեժիմը ձգտում է ամեն գնով պահպանել իշխանությունը, որը նա օգտագործում է իր հարստացման համար: 2013 թվականին կայանալիք նախագահական ընտրություններում իր հաղթանակը երաշխավորելու համար ներկայիս ռեժիմը պատրաստ է ոչ միայն ղեկավարման փափուկ մեթոդների, այլև՝ բռնությունների:
Այդ մարդիկ պատրաստ են օգտագործել բոլոր հնարավորությունները իշխանության մնալու համար: 2008-2010 թվականներին իշխանությունները փորձեցին ապացուցել, որ Ադրբեջանում չի կարող գոյություն ունենալ ընդդիմություն, քաղաքացիական հասարակություն ու անկախ մեդիա, և որ բոլորը պետք է ենթարկվեն իշխող ռեժիմին:
Սակայն այդ քաղաքականությունը չարդարացվեց, ռեժիմը չկարողացավ հաղթանակ տանել ռեալ ընդդիմության ու քաղաքացիական հասարակության նկատմամբ: Իշխանամետ ճամբարում կան մարդիկ, որոնք քաջատեղյակ են աշխարհում ընթացող գործընթացներից, և թե ինչ է սպասվում բռնապետերին, որոնք իրենց իշխանությունը պահում են 30-40 տարի՝ առանց հաշվի առնելու սեփական ժողովրդի կարծիքը:
Դրա համար էլ նրանք փորձում են աշխարհին ցույց տալ, որ Ալիևի ռեժիմը, ի տարբերություն արաբական բռնապետական ռեժիմների, հանդիսանում է եվրոպական զարգացման ու ժողովրդավարության կողմնակից: Ընդդիմադիր «Հասարակական պալատ» շարժումը բազմիցս հայտարարել է, որ պետության ներկայիս ղեկավարը չպետք է առաջադրի իր թեկնածությունը 2013 թվականի նախագահական ընտրություններում:
Ես կարծում եմ, որ Ալիևը չի առաջադրի իր թեկնածությունը: Աշխարհն արագ է փոխվում: Դա չեն կարող տեսնել միայն կույրերն ու հիմարները: Մինչև 2013 թվականի նախագահական ընտրությունները դեռ շատ ժամանակ կա: Ալիևների կլանի ղեկավարման ժամանակ ոչ մի անգամ չեն անցկացվել արդար ընտրություններ:
Մենք պետք է շարունակենք մեր առաքելությունը երկրում՝ պայքարելով ժողովրդավարության համար: Փոփոխությունների ալիքն արդեն մոտենում է Հարավային Կովկասին: Փոփոխություններն անխուսափելի են, և մենք պետք է ձգտենք, որ դրանք հնարավորինս արագ տեղի ունենան»:
Հիշեցնենք, որ որոշակի տվյալներով՝ Ադրբեջանի նախագահի պաշտոնում կարող է առաջադրվել ոչ թե Իլհամ Ալիևը, այլ նրա կինը՝ Մեհրիբան Ալիևան։
