«Ընդդիմության ներկայացուցիչները կարծում էին, որ կառավարության ծրագիրը պետք է հինգ տարվա գծագրված փաստաթուղթ լիներ: Կարճ ժամանակահատվածում հնարավոր չէր ամենայն մանրամասնությամբ հստակ մեխանիզմներ գծագրել: Այդ ծրագիրը պարզապես առաջիկա հինգ տարվա քաղաքական փաստաթուղթ է, որտեղ սահմանված են անելիքների մոտավոր պատկերները»,- լրագրողների հետ հանդիպմանն ասաց ՀՀԿ պատգամավոր Խոսրով Հարությունյանը:
Ըստ նրա՝ այդ փաստաթուղթը պետք է պարունակի զուտ քաղաքական մեխանիզմներ. «Այն քաղաքական հռչակագիր է: Ամեն տարի էլ ցուցանիշներ են եղել, ոչ թե խորը մեխանիզմներով ուրվագծված սահմանումներ: Կառավարության գործունեության ծրագիրը պետք է օրենսդրական մի շարք դրույթների ընդունման հիմք լինի: Ավելին պահանջելը այնքան էլ իրատեսական չէ»:
ՀՀԿ-ական պատգամավորի խոսքով՝ ամենակարևոր հարցերից մեկն այն է, թե կառավարությունը կկարողանա՞ արդյոք իրականացնել այդ 5 տարվա ծրագիրը. «Քանի որ սա ամենագլխավոր հարցն է, կարելի է եզրակացնել, որ կառավարության հանդեպ դեռևս չկա վստահություն: Սակայն 2008-ի տնտեսական ճգնաժամից կառավարությունը դասեր քաղեց և կարողացավ մարդկանց ետ պահել լուրջ սոցիալական ցնցումներից»:
«Ես հիացած չեմ կառավարության աշխատանքով: Նրանք արդյունավետ չեն հակազդում ճգնաժամին, սակայն կառավարությունը ճիշտ ռազմավարություն կիրառեց՝ փորձեր անելով զարգացնել ներքին ռեսուրսները»,- հավելեց պատգամավորը:
Նրա խոսքով՝ վերջին երկու տարիների ընթացքում կարծես զարգանում է նաև արտահանման շուկան. «Ճգնաժամի պայմաններում հանրության կյանքը չէր կարող բարելավվել: Այս պայմաններում հնարավոր էր աղքատության աճի ավելացում: Պետք է հաշվի առնել, որ կառավարությունը կարողացավ բանկային համակարգը փրկել փլուզումից: Կառավարությունը կարողացավ ետ պահել հասարակությանը լուրջ վտանգներից: Ինձ համար դա ամենակարևորն է»:
Ամփոփելով՝ Խոսրով Հարությունյանը անդրադարձավ նաև ՀՀ արտաքին պարտքին՝ նշելով, որ դա մեզ համար այնքան էլ լուրջ սպառնալիք չէ. «Աշխարհն առանց պարտքի չի ապրում»:
