Վարչապետ Տիգրան Սարգսյանը երեկ մասնակցել է Արարատի մարզի Սիփանիկ գյուղի ձկնաբուծական տնտեսություններից մեկում ջրաչափի տեղադրման փորձնական ծրագրի իրականացմանը: Այս մասին ասվում է կառավարության տարածած մամլո հաղորդագրությունում:
Միջոցառմանը ներկա են եղել ՀՀ գյուղատնտեսության և բնապահպանության նախարարները, պաշտոնատար անձինք, Արարատյան դաշտում գործունեություն ծավալող ձկնաբույծներ: Հիշեցնենք, որ ջրաչափի փորձնական տեղադրման պայմանավորվածությունը ձեռք էր բերվել 2011 թ. փետրվարի 3-ին վարչապետ Տիգրան Սարգսյանի մոտ կայացած խորհրդակցության արդյունքում:
Ծավալված մտքերի փոխանակման ընթացքում ձկնաբույծները հնչեցրել են իրենց մտահոգությունները ջրաչափիչ սարքերի տեղադրման խնդիրների վերաբերյալ` անհրաժեշտ համարելով յուրաքանչյուր ձկնաբուծական տնտեսության համար անհատական չափորոշիչների կիրառումը:
Անհրաժեշտ համարելով Արարատյան դաշտի ստորերկրյա խորքային (այդ թվում` ինքնաշատրվանող) հորերից ջրային ռեսուրսների հաշվառման, արդյունավետ կառավարման և պահպանության ուղղությամբ միջոցառումների ձեռնարկումը` վարչապետ Սարգսյանը նշել է, որ յուրաքանչյուր ձկնաբուծական տնտեսության համար կիրառվելու են ջրաչափիչ սարքերի տեղադրման անհատական տեխնիկական չափորոշիչներ, և ձկնաբույծները կարող են ինքնուրույնաբար ձեռք բերել ջրաչափիչ սարքեր իրենց նախընտրած ընկերությունից:
«Մեր նպատակն է կրկնապատկել ձկնաբույծների կարողությունները: 2010 թ. մենք ունեցել ենք լուրջ նվաճումներ. շուրջ 500 տոննա ձուկ է արտահանվել Հայաստանի Հանրապետությունից: Կառավարությունը լուրջ ջանքեր է գործադրել, որպեսզի 22 տնտեսվարողներ արտոնագիր ստանան Ռուսաստանում և հնարավորություն ունենան արտահանել իրենց արտադրանքը:
Մեր գնահատականներով` 2011 թ. այս ցուցանիշը պետք է կրկնապատկվի, քանի որ այն կարողությունները, որ ջրային տնտեսություններն ստեղծել են, արդեն հույս են ներշնչում, որ 2011 թ. այդ արտադրանքը մենք ստանալու ենք:
Բոլոր ձկնաբուծական տնտեսություններում ներդնելու ենք ստանդարտներ` սկսած ջրաչափերից և ավարտած ձկնաբուծության ոլորտում կիրառվող տեխնոլոգիաներով, որպեսզի վստահ լինենք, որ ձկնաբույծներն աշխատում են սննդի անվտանգության ապահովման կանոններով: Դա բխում է և՛ մեր բնակչության շահերից, և՛ միջազգային բոլոր պարտավորություններից»,- լրագրողներին ասել է վարչապետը:
Խոսելով անօրինական ջրօգտագործման հետ կապված խնդիրներից` վարչապետն ընդգծել է. «Տասնյակ համայնքներ այսօր զրկվել են խմելու և ոռոգման ջրից այն պատճառով, որ ջրային ռեսուրսները ռացիոնալ չեն օգտագործվում. կան շուրջ 3500 հորեր, որոնցից 2000-ն անօրինական են, և պետությունը պատշաճ ձևով չի իրականացնում օգտագործվող ջրերի հաշվառում:
Այդ խնդիրն առնչվում է նաև ձկնաբուծական ընկերություններին. մեր ուսումնասիրությունները ցույց են տվել, որ կան ձկնաբուծական ընկերություններ, որոնք առանց համապատասխան թույլտվության ունեն խորքային հորեր և այդ ջուրն անօրինական օգտագործում են` ստեղծելով նաև էկոլոգիական ռիսկեր մեզ համար:
Անհրաժեշտություն կա հաշվառել ջուրն ամբողջությամբ, և հաշվառման տեսակետից առաջարկում ենք օգտագործել ջրաչափեր այն 60 չափորոշիչների կիրառմամբ, որոնք այսօր պետության կողմից հաստատված են և ընդունելի: Ամեն մի ջրային տնտեսություն իր օգտագործած ջրի ծավալներին համապատասխան պետք է ընտրի, թե ինչ ջրաչափիչ սարք է օգտագործելու»:
