Վրացական «Ասավալ-դասավալի» թերթին տված հարցազրույցի ժամանակ Վրաստանի նախկին նախագահ Էդուարդ Շևարդնաձեն այսօր զուգահեռներ է անցկացրել Վրաստանի գործող իշխանությունների ներկայիս գործողությունների և ֆաշիստական գաղափարախոսության միջև:
Շևարդնաձեն ֆաշիզմ է որակել երթուղային տաքսիներում ռադիո լսելն արգելելու և Global TV-ի, այդ թվում՝ նաև ընդդիմադիր միլիարդատեր Բիձինա Իվանիշվիլիի «9-րդ ալիքի» հեռարձակման համար տեղադրված արբանյակային ալեհավաքներն ապամոնտաժելու վերաբերյալ վրացական իշխանությունների որոշումները:
Դրա հետ մեկտեղ, Շևարդնաձեն ընդգծել է, որ ֆաշիստական գաղափարախոսությունն իր առջև նպատակ էր դրել համայն աշխարհի մասշտաբով ուժեղացնել գերմանական ռասան, մինչդեռ Սաակաշվիլիի իշխանությունը չի սիրում իր իսկ ժողովրդին:
Շևարդնաձեն հավելել է, որ սեփական ժողովրդի դեմ պայքարում Սաակաշվիլիի իշխանության գործադրած ջանքերը կզարմացնեին անգամ ֆաշիզմի գաղափարախոսներին՝ նկատի ունենալով, որ ինքնակամ ռադիո միացնելու համար աշխատանքից հեռացվել են երթուղային տաքսիների մի շարք վարորդներ:
