Aravot.am-ի հարցին՝ նախընտրական շրջանում ընդդիմությունը բավականին քննադատություն հնչեցրեց Ձեր և Ձեր կառավարության հասցեին, կյանքը ցույց տվեց, որ Դուք շարունակելու եք պաշտոնավարել՝ հաշվի առնելո՞ւ եք հնչեցված քննադատությունը, քանի որ դրանոմ օբյեկտիվ մաս էլ կար, վարչապետ Տիգրան Սարգսյանը պատասխանել է.
«Իհարկե, մենք միշտ էլ ասել ենք, որ օբյեկտիվ քննադատությունը միայն ուժեղացնում է կառավարությանը, որովհետև հնարավորություն է տալիս միանգամից բացահայտել մեր թույլ կողմերը և դրանց վրա ուշադրությունը կենտրոնացնել, գտնել հաղթահարելու ճանապարհներ: Ինչքան ուժեղ և կառուցողական լինի մեր ընդդիմությունը, այնքան ուժեղ կլինի կառավարությունը, մանավանդ իշխանությունն ու պետությունը, ինչին էլ մենք ձգտում ենք: Դա դեմոկրատական հասարակության զարգացման տրամաբանությունն է:
Ընդդիմությունը կլինի թույլ՝ դա նշանակում է, որ նաև իշխանությունը կլինի թույլ: Դրա համար, իհարկե, մենք շատ ուշադիր հետևում ենք ցանկացած քննադատության, որը հնչում է մեր հասցեին, փորձում ենք այդ քննադատությունից մեզ համար դասեր քաղել, ինչը, բնականաբար, մեզ պետք է ուժեղացնի: Մենք միշտ էլ տրամադրված ենք եղել ընդդիմության հետ կառուցողական երկխոսության»:
