Մյանմարի հեղափոխության առաջնորդ, Խաղաղության Նոբելյան մրցանակի դափնեկիր Աուն Սան Սու Չժին Բանգկոկում Համաշխարհային տնտեսական ֆորումի մասնակիցներին կոչ է արել իր երկրում «ավելորդ լավատեսությամբ» բարեփոխումններ չձեռնարկել՝ միաժամանակ չհրաժարվելով նրա տնտեսության մեջ ներդրումներ կատարելուց:
Ինչպես հաղորդում է BBC-ն, նրա խոսքերով՝ Մյանմարում բարեփոխումների գործընթացը շարունակվում է, հետևաբար միջազգային հանրությունը պետք է այդ բարեփոխումներին նայի «առողջ կասկածամտությամբ»:
Ընդ որում՝ Սու Չժին համոզված է, որ միջազգային հանրության կողմից իր երկրին տրամադրվող ֆինանսական աջակցությունը կբարելավի կրթությունը և աշխատատեղերի շուկայում տիրող իրավիճակը:
Նշենք, որ սա Աուն Սան Սու Չժիի առաջին հրապարակային ելույթն է նման մակարդակի հանդիպանն ավելի քան 20 տարվա մեջ առաջին արտասահմանյան այցի շրջանակներում: Նշվում է, որ ավելի ուշ՝ հունիսին, նա պատրաստվում է այցով մեկնել Եվրոպա:
