Սևանա լճի ճահճացման վերաբերյալ հայ բնապահպանների կարծիքները երկփեղկվել են:
Բնապահպանների մի հատված շարունակում է պնդել, որ լճի ջրի մակարդակի բարձրացման հետևանքով ջրի տակ մնացած հարյուրավոր ապօրինի և օրինական շինությունները, Սևանի շուրջը տնկված արհեստական անտառները, ավտոճանապարհները, նույնիսկ գազատար խողովակաշարերը կարող են մեծ վնասներ հասցնել լճին և, ի վերջո, ճահճացնել այն:
Իսկ բնապահպանների մեկ այլ հատված պնդում է, որ ջրի տակ մնացած կանաչ զանգվածը ոչ մի կերպ չի վնասի Սևանին:
«Ջրի տակ մնացած կանաչ զանգվածը չի հասցնում արագ քայքայվել և կարող է ճահճացնել լիճը: Մասնագետներ ունենք, և բավական լուրջ մասնագետներ, ովքեր պնդում են, թե սա ճահճացման չի տանի, ու բերում են որոշ հայտնի լճերի օրինակներ, սակայն իրավիճակները լրիվ տարբեր են»,- «Առաջին լրատվական»-ին հայտնեց բնապահպան Կարինե Դանիելյանը:
Նշենք, որ դեռ 2005 թվականից ՀՀ կառավարությունը գումար էր հատկացնում տարեկան մոտ 100 հա ափամերձ տարածք մաքրելու համար:
Իսկ ՀՀ 2009 թ. պետական բյուջեով ՀՀ բնապահպանության նախարարության կողմից իրականցման ենթակա ծրագրերի գծով գնումների ցանկում ներառվեցին նաև Սևանա լճի շրջակայքի ջրածածկվող անտառային տարածքների գույքագրման և քարտեզագրման աշխատանքները: