2000թ. այս օրը հայ ազգային հերոս, Հայաստանի Առաջին Հանրապետության զորավար, ֆիդայի, Ազատագրական շարժման գործիչ, ՀՅԴ անդամ և Հայաստանի Առաջին Հանրապետության պաշտպանության նախարար Դրաստամատ Կանայանի (Դրո) մարմինը վերահուղարկավորվեց Ապարանի հերոսամարտի հուշահամալիրի աջ եզրաթմբի վրա:
Դրաստամատ Կանայանը ծնվել է 1884թ. մայիսի 31-ին Իգդիրում, երիտասարդ տարիքից անդամակցել է Հայ հեղափոխական դաշնակցությանը: 1905թ. կուսակցության հանձնարարությամբ ահաբեկել է Բաքվի նահանգապետ, հայատյաց Նակաշիձեին: Հաջորդ տարիներին զբաղվել է Արևմտյան Հայաստան զենք փոխադրելով:
1914թ. նոյեմբերին եղել է Կամավորական երկրորդ ջոկատի հրմանատար: Դրոն արդեն մեծ հեղինակություն ուներ որպես հրամանատար օսմանյան բանակի դեմ տարած հաղթանակներով: 1918թ. մարտից մինչև 1918թ. ապրիլ Հայոց ազգային խորհրդի կողմից նշանակվել է Արևմտյան Հայաստանի ռազմական կոմիսար:
1918 թ. մայիսի 23-ին նշանակվել է Ապարանի հերոսամարտի հրամանատար: Հերոսամարտի օրերին՝ մայիսի 23-29-ին, նրա գլխավորությամբ հայկական ուժերը պարտության են մատնել թուրքական շուրջ 13.000-անոց բանակին և կասեցրել Ապարանի կողմից նրանց մուտքը Արարատյան դաշտ:
1918-1920թթ. Դրաստամատ Կանայանը դառնում է Հայաստանի առաջին հանրապետության պաշտպանության նախարար և գլխավորում հայկական զինված ուժերը մի շարք հաջող մարտերում:
Որպես պաշտպանության նախարար մինչև 1918թ. վերջը Դրոն իր վրա է վերցնում 1918թ հայ-ադրբեջանական և հայ-վրացական պատերազմների պատասխանատվությունը, իսկ ավելի ուշ` 1920թ., հայ-թուրքական պատերազմինը:
1920թ. Առաջին հանրապետության վերացումից հետո Դրոն անցնում է Իրան, այնտեղից` Գերմանիա: Դրոն ակտիվ գործունեություն է ծավալել Երկրորդ համաշխարհային պատերազմի ժամանակ: Անուրանալի դեր ունի Եվրոպայի հայերին և հայ ռազմագերիներին փրկելու գործում։
Երկրորդ համաշխարհային պատերազմի ավարտից հետո Դրոն հաստատվում է ԱՄՆ-ում, որտեղ շարունակվել է զբաղվել քաղաքական ակտիվ գործունեությամբ հայկական հարցի լուծման համար:
Վախճանվել է 1956 թ. մարտի 8-ին Բոստոնում:
ՀՀ պաշտպանության նախարարությունը, Դրոյի ժառանգների միջնորդությամբ, հիմնել է Դրաստամատ Կանայանի անվան ռազմավարական ակադեմիան:
2001թ. հունվարին ՀՀ պաշտպանության նախարարությունը սահմանել է «Դրաստամատ Կանայան» գերատեսչական մեդալը, որով պարգևատրվում են ռազմական ուսուցման բնագավառում աչքի ընկած զինվորականները, ազատամարտիկները և քաղաքացիական անձինք: