ՄԱԿ-ի և ԱՊԼ-ի հատուկ բանագնաց Քոֆի Անանը կարծում է, որ սիրիական հակամարտության կարգավորմանն ուղղված իր ծրագրի իրականացումը վերջին հնարավորությունն է, որը թույլ կտա խուսափել քաղաքացիական պատերազմից: Այս մասին հաղորդել է Agence France Presse-ը` հիմնվելով ՄԱԿ ԱԽ-ում Անանի ելույթի վրա:
Դրա հետ մեկտեղ Անանն ընդգծել է, որ «իր համագործակցությունը ՄԱԿ-ի Անվտանգության խորհրդի հետ ժամանակի առումով անսահմանափակ չէ»:
Reuters գործակալության փոխանցմամբ` Անանը նշել է, որ սիրիական բանակի զինծառայողները նախկինի պես շարունակում են մնալ Սիրիայի քաղաքների փողոցներում, բայց նրանց ջոկատները թվային առումով նվազել են:
Հիշեցնենք, որ ապրիլի 15-ին Սիրիա է ժամանել ՄԱԿ-ի դիտորդների առաջին խումբը, որը հետևում է կրակի դադարեցման համաձայնագրի կատարմանը: Ապրիլի 21-ին ՄԱԿ ԱԽ-ն հաստատել էր Սիրիա 300 դիտորդներ ուղարկելու որոշումը:
