ՌԴ Պետդուման արտահերթ նիստի ժամանակ հաստատել է ՌԴ նախկին նախագահ Դմիտրի Մեդվեդևին վարչապետի պաշտոնում: Դրանից անմիջապես հետո նրա նշանակման հրամանը ստորագրել է Վլադիմիր Պուտինը:
Ինչպես հայտնում է РИА Новости գործակալությունը, 299 պատգամավոր կողմ է քվեարկել նրա թեկնածությանը, իսկ 144-ը` դեմ, ձեռնպահներ չեն եղել:
Ավելի վաղ Կոմունիստական կուսակցությունը և «Սպրավիդլիվայա Ռոսիան»–հայտարարել էին, որ իրենք կողմ չեն քվեարկելու Մեդվեդևի թեկնածությանը: Նախկին նախագահին աջակցել են «Եդինայա Ռոսիա» և Լիբերալ-դեմոկրատական կուսակցությունը:
Մեդվեդևի թեկնածությունը Պետդումա է մտցրել Վլադիմիր Պուտինը: Նախագահն իր ելույթում նրան անվանել է «հմուտ քաղաքական գործիչ, որի գործունեությունն ուղղված է բարեփոխումների իրականացմանը»:
Նշենք, որ Պուտինը դեռևս իր նախընտրական քարոզարշավի ժամանակ խոստացել էր Մեդվեդևին առաջադրել վարչապետի պաշտոնում:
