ԲՀԿ-ն արդեն իսկ չեզոքացած է. այսօր «Առաջին լրատվական»-ի հետ զրույցում նման տեսակետ հայտնեց քաղաքական և ընտրական տեխնոլոգիաների մասնագետ Արմեն Բադալյանը`խոսելով նոր գումարման խորհրդարանում քաղաքական ուժերի հնարավոր կոալիցիայի և առկա ինտրիգների շուրջ:
Ըստ քաղտեխնոլոգի` երեկ տեղի ունեցավ Հանրապետականի բրեժնևյան հաղթանակը, ուստի կոալիցիա կազմելու հարցը սուբյեկտիվ հարց է: Արմեն Բադալյանը նշեց, որ տրամաբանորեն կոալիցիայի կարիքն այլևս չկա, որովհետև եթե իշխող կոսւակցությունը 70-ից ավելի ներկայացուցիչ ունի խորհրդարանում, այլևս կոալիցիա ձևավորելու իմաստ չկա. այս դեպքում դա իսկապես կդառնա ձևական կոալիցիա:
«Այս ընտրություններից հետո ամբողջ քաղաքական դաշտը փոխվում է. ԲՀԿ ճակատագիրն արդեն «ոչ մի բան» է լինելու, ԲՀԿ-ն արդեն իսկ չեզոքացած է, որովհետև այդ ինտրիգն արդեն իսկ լուծվեց, և հիմա ինտրիգ է առաջացել ՀՀԿ երեք թևերի միջև: Եթե մինչև մայիսի 6-ը քաղաքական դաշտում պայքարը գնում էր բոլոր քաղաքական ուժերի միջև, այսօր այդ պայքարը տեղափոխվելու է ՀՀԿ թևերի միջև: Հիմա հարց է լինելու, թե Հանրապետականի մեջ որ թևն է իշխող դառնալու»,- մեկնաբանեց Արմեն Բադալյանը` հավելելով, որ պայքարը լինելու է քրեաօլիգարխիկների, բարեփոխիչների և երիտթևի միջև:
Քաղտեխնոլոգի կարծիքով` Հանրապետականը երկար է լինելու իշխանության գլուխ, իսկ Հանրապետականի ներսում գլխավորելու է նախագահական երիտթևը:
