Մի շարք իսլամիստական ֆորումներում հայտնվել է ԱՄՆ քաղաքացի Ուորեն Վայնշտեյնի տեսաուղերձը՝ ուղղված ԱՄՆ նախագահ Բարաք Օբամային: Վայնշտեյնը, որն «Ալ-Քաիդա»-ի կողմից առևանգվել է անցյալ տարվա օգոստոսին Պակիստանում, խնդրում է ԱՄՆ նախագահին բավարարել ահաբեկիչների պահանջները, հակառակ դեպքում նրանք սպառնում են սպանել իրեն:
Իսլամիստական ինտերնետ-ռեսուրսների մոնիտորինգով զբաղվող ամերիկյան SITE կազմակերպության տվյալներով՝ տեսանյութը հրապարակվել է As-Sahab-ի կողմից, որը համարվում է «Ալ-Քաիդա»-ի «մեդիական» կազմակերպությունը: Ինչպես հաղորդում է Dawn.com-ը, 2 րոպե 40 վայրկյան տևողությամբ ձայնագրության մեջ Վայնշտեյնը պակիստանյան ավանդական հագուստով սկզբում դիմում է կնոջը: Նա հայտնում է, որ «իր հետ ամեն իչ կարգին է, իր մասին հոգ են տանում, և հնարավորություն կա անհրաժեշտ դեղամիջոցներն ընդունելու»:
Այնուհետև պատանդը դիմում է Օբամային և խնդրում իրականացնել ահաբեկիչների բոլոր պահանջները: Ավելի վաղ Վայնշտեյնին ազատ արձակելու համար ահաբեկիչները պահանջում էին ազատել 1993 թ. Նյու Յորքի Առևտրի միջազգային կենտրոնի դեմ կազմակերպված ահաբեկչության մասնակիցներին:
«Եթե դուք բավարարեք նրանց պահանջները, ես կապրեմ: Եթե ոչ, ես կմեռնեմ,- ասում է պատանդը,- կարևոր է, որպեսզի հապաղում չլինի: Ցանկացած ձգձգում միայն ավելի կբարդացնի իմ դրությունը»:
Անցյալ տարվա դեկտեմբեին Բեն Լադենին փոխարինող Այման Ալ-Զավահիրին հայտարարել էր, որ Վայնշտեյնը կազատվի, եթե ԱՄՆ-ը դադարեցնի ռազմական գործողությունները Պակիստանում, Աֆղանստանում, Եմենում և Սոմալիում:
70-ամյա Ուորեն Վայնշտեյնը պատանդ է վերցվել Պակիստանում 2011 թ. օգոստոսի 13-ին: Նա ամերիկյան J.E. Austin Associates ընկերության աշխատակից է, որն զբաղվում է զարգացող երկրներ մարդասիրական օգնություն ուղարկելու աշխատանքներով:
