34/45 ընտրատարածքում քիչ առաջ իր ընտրությունը կատարեց նաև Գյումրիի քաղաքապետ Վարդան Ղուկասյանը:
Վերջինս ընտրությունների ընթացքը գնահատեց դրական՝ նշելով, որ թեթև խնդիրներ են առաջ գալիս, որոնք հերթականությամբ ստանում են համապատասպան լուծումներ` օրենքի համաձայն. «Լուրջ, արտառոց դեպքեր չեն գրանցվել, հուսով եմ, որ մինչև վերջ էլ նման կերպ կվերջացնենք:
Մենք ընտրում ենք մեր երկիր ապագայի համար։ Բարձրյալն Աստված մեր ազգը պահել և պահպանել է մինչև այսօր: Եվ ես կուզենայի, որ Աստված իմացություն տա մեր հայորդիներին, և Աստծո կամոք ընտրություն լինի: Այսինքն՝ ինքը գիտի, թե ով է ժողովրդին ծառայելու, ով է այսօր անձնականին ծառայում և ով՝ ոչ»:
Այս անգամ ևս քաղաքապետը ընտրություններին եկել էր թոռնիկի հետ, ինչի հետ կապված նշեց, որ որպես քաղաքացիական հասարակության ներկայացուցիչներ՝ պատրաստվում են ընտրություններին. «Այս անգամ էլ եկել եմ թոռնիկիս հետ, որն ինձ հետ նույնպես ընտրություն կատարեց: Ես նայում եմ նրան և վստահ եմ, որ ինքն էլ արժանի հայուհի է դառնալու»: Ապա նաև ավելացրեց, որ ընտանիքի մյուս անդամներն էլ չափահաս են, և կինը երեխաների հետ նույնպես կատարել է իր ընտրությունը:
Իսկ թե արդյո՞ք ընտրությունները լարվածություն չեն առաջացնում՝ ասաց, որ ինքը կլարվի միայն Աստծո դատաստանի ժամանակ. «Այս դեպքերը ուղղակի սովորական բաներ են ու չեն կարող լարվածություն առաջացնել»,- եզրափակեց քաղաքապետը:
