Կորսիկայի մայրաքաղաք Այաչոյի կերպարվեստի թանգարանից շուրջ մեկ տարի առաջ գողացված 4 նկարները հայտնաբերվել են քաղաքի ավտոկայանատեղիներից մեկում:
Կտավները եղել են ամբողջական` առանց վնասվածքների: Ինչպես տեղեկացնում են ֆրանսիական ԶԼՄ-ները, Նիկոլ Պուսենի, Յակոպո Բելինիի, Մարիոտտո դի Նարոդոյի և 15-րդ դարի անհայտ մի նկարչի վրձնին պատկանող կտավներն արդեն մյուս շաբաթ թանգարանում ցուցադրության կհանվեն:
Կորսիկայի դատախազ Տոմա Պիզոնի խոսքերով` նկարները հայտնաբերվել են ուրբաթ երեկոյան՝ Այաչոյից դուրս գալու ճանապարհին գտնվող ավտոկայանատեղիում: Արվեստի գործերի գտնվելու վայրի մասին դատախազությունը տեղեկացել է անանուն զանգից:
Այժմ կտավները գտնվում են Այաչոյի արդարադատության պալատում, մայիսի 7-ին դրանք կհանձնվեն թանգարանին: Գողությունը տեղի էր ունեցել 2011-ի փետրվարի 19-ին:
Պարզվել է, որ կտավները գողացել է թանգարանի աշխատակիցներից մեկը, որը ֆինանսական անհամաձայնություն է ունեցել Այաչոյի քաղաքապետի հետ: Այդ կերպ նա փորձել է ամրապնդել իր դիրքերը քաղաքային իշխանությունների դեմ պայքարում, մասնավորապես՝ իրեն ծառայողական բնակարան տրամադրելու հարցում: Արդյունքում բանակցությունները քաղաքապետի հետ տեղի են ունեցել:
Սակայն երբ աշխատակիցը որոշել է նկարները հետ վերադարձնել, պարզվել է, որ նրա ավտոմեքենայի ապակին կոտրել են և բնանկարները գողացել երկրորդ անգամ:
Այաչոյի թանգարանը, որը հայտնի է Պալատ Ֆեշ անվանումով, Ֆրանսիայի խոշորագույն թանգարաններից մեկն է և զիջում է միայն Փարիզի Լուվրին:
