Ֆրանսիայի նախագահի պաշտոնի թեկնածուներ` գործող նախագահ Նիկոլա Սարկոզին և սոցիալիստ Ֆրանսուա Օլանդը, շաբաթ` ընտրությունների նախօրեին, հանգստանում են:
Նախագահ-թեկնածուն շաբաթ հանդիպել է իր թիմի ներկայացուցիչների հետ, սակայն օրվա մնացած մասը մտադիր է անցկացնել տիկնոջ` Կառլա Բրունի-Սարկոզիի և իրենց դստեր` Ջուլիայի հետ:
Իր հերթին Օլանդը, ինչպես և նախորդ փուլից առաջ, մեկնել է հարազատ դարձած Թյուլ քաղաք, որտեղ երկար ժամանակ քաղաքապետ է եղել: Նա լրագրողուհի Վալերի Թրիերվեյլերի հետ զբոսնել է տեղի շուկայում, ինչպես որ նախկինում էր անում: Բացի դրանից՝ մտադիր է հանդիպել մտերիմ ընկերների, հարազատների և տեղի իշխանությունների հետ:
Օլանդը ընտրությունների արդյունքների հայտարարությանը ևս սպասելու է Թյուլում: Սարկոզին կմնա Փարիզում: Նախատեսվում է, որ նա ընտրությունների արդյունքների վերջնական հայտարարությունից հետո ելույթ կունենա իր թիմակիցների և լրագրողների առջև: Համաձայն վերջին սոցհարցումների՝ սոցիալիստների թեկնածուն առաջատարն է 52,5-53,5%-ով ընդդեմ 46,5-47,5%-ի:
