Իսրայելի արտգործնախարար Ավիգդոր Լիբերմանը կոչ է արել չչափազանցնել Եգիպտոսի որոշումը՝ կապված Իսրայելին բնական գազ մատակարարելու երկարաժամկետ գործարքների դադարեցման հետ: Ինչպես հաղորդում է իսրայելական MIGnews գործակալությունը, քաղաքական գործիչը հույս ունի, որ այդ վեճը կարող է լուծվել, ինչպես ցանկացած բիզնես բնույթի վեճ:
«Մենք ուշադիր հետևում ենք, թե ինչ է կատարվում Եգիպտոսում, և հույս ունենք, որ ամեն ինչ կփոխվի դեպի լավը»,- ասել է Լիբերմանը:
Իր հերթին «Ավորդա» կուսակցությունից Կնեսետի պատգամավոր Իցհակ Հերցոգը նշել է, որ երկրներից ոչ մեկը շահագրգռված չէ հարաբերությունների վատթարացմամբ:
«Առայժմ ոչ մի դրական զարգացում չկա, սակայն ես կարծում եմ, որ չպետք է հապշտապ քայլեր ձեռնարկենք… Քաղաքական մակարդակում բոլորիս՝ թե Իսրայելի, թե Եգիպտոսի համար ակնհայտ է, որ անհրաժեշտ է պահպանել խաղաղության պայմանագիրը»,- ասել է նա:
Հիշեցնենք. կիրակի Եգիպտոսը հայտարարեց, որ չեղյալ է համարում 2005 թ. հունիսին կնքված գազի շուրջ պայմանագիրը, որի պատճառը իսրայելական կողմից իր վրա վերցրած պարտականությունները չկատարելն է:
