Նախագահ Սերժ Սարգսյանն այսօր Երևանի քաղաքապետարանում մասնակցել է «Երևանը 2012թ. գրքի համաշխարհային մայրաքաղաք» ծրագրի բացման արարողությանը և այդ առիթով Երևանի քաղաքապետի պաշտոնական ընդունելությանը: «Առաջին լրատվական»-ին տեղեկացնում են նախագահի մամլո գրասենյակից: Քաղաքապետարանում Սերժ Սարգսյանը մասնակցել է նաև «Երևանը 2012թ. գրքի համաշխարհային մայրաքաղաք» ծրագրի առիթով թողարկված գեղաթերթիկի մարման արարողությանը, դիտել Երևանը 2012թ. գրքի համաշխարհային մայրաքաղաք հռչակմանը նվիրված «Բուենոս Այրես» խորագրով արխիվային լուսանկարների ցուցահանդեսը:
Այնուհետև Հանրապետության ղեկավարը Երևանի քաղաքապետ Տարոն Մարգարյանի և ծրագրի բացման առիթով Երևան ժամանած հյուրերի հետ միասին քաղաքապետարանից քայլելով գնացել է Հանրապետության հրապարակ, որտեղ դիտել է Երևանի հանրակրթական դպրոցների բազմաթիվ տաղանդավոր երեխաների մասնակցությամբ «ԱմրաԳՐԻ՛Ր ապագադ» խորագրով կավճանկարչության և գեղանկարչության աշխատանքները:
Իր ելույթում Սերժ Սարգսյանը տեղեկացրել է, որ Երևանը Գրքի համաշխարհային մայրաքաղաք հռչակելու առթիվ այստեղ են աշխարհի շուրջ երեսուն երկրներից ժամանած ավելի քան հիսուն բարձրաստիճան հյուրեր, այդ թվում` ՅՈՒՆԵՍԿՕ-ից, Բուենոս-Այրեսից: «Հիշարժան այս օրերին, նաև ողջ տարվա ընթացքում, մայրաքաղաքում, հանրապետության քաղաքներում և շատ այլ համայնքներում բազմաթիվ մշակութային իրադարձություններ են սպասվում: Դրանք մեկ գլխավոր նպատակ ունեն. ևս մեկ անգամ կարևորել գրքի դերը մեր կյանքում, ևս մեկ անգամ աշխարհի քարտեզին մեր տեղը և էությունը ցույց տալ, կրկին փաստել, որ մենք ոգու ժողովուրդ ենք և գիտենք գնահատել, պահպանել ու հարստացնել ոչ միայն հայոց, այլև համաշխարհային ու համամարդկային հոգևոր մշակութային ժառանգությունը, որ յուրաքանչյուր քաղաքակիրթ ժողովրդի այցեքարտն է, նրա լինելիության գլխավոր նախապայմանը»,- նշել է Ս. Սարգսյանը:
