Սիրիայի իշխանությունների միջոցները կրկնակի կրճատվել են ԵՄ-ի և այլ երկրների կողմից պատժամիջոցների կիրառումից հետո: Այս մասին հայտարարել է Ֆրանսիայի արտգործնախարար Ալեն Ժյուպեն՝ ելույթ ունենալով Սիրիայի դեմ պատժամիջոցների հարցով խմբի նիստին:
«Սիրիայի իշխանությունները, որոնց ֆինանսական պաշարները, ըստ մեր տեղեկությունների, կրկնակի կրճատվել են, շարունակում են ակտիվորեն այլընտրանքային ճանապարհներ փնտրել (միջոցներ ստանալու համար-1in.am): Որոշ երկրներ միանշանակորեն օգնություն են տրամադրում վարչակարգին, մյուսներն ուղղակիորեն կամ միջնորդավորված նրան իրենց շուկան են տրամադրում»,- ասել է Ժյուպեն:
Նա կոչ է արել «համատեղ ջանքերով արձագանքել այդ մանևրներին և տեղեկատվություն փոխանակել կիրառվող պատժամիջոցների վերաբերյալ»: Նախարարը կարևորել է սահմանված պատժամիջոցների արդյունավետությունը և նշել է, որ այժմ պատժամիջոցների ցուցակում է գտնվում Սիրիայի նախագահ Բաշար Ալ-Ասադին մոտ կանգնած մարդկանց և կազմակերպությունների 150 անուն:
Փարիզում այսօր հավաքվել են 5 երկրների արտգործնախարարներ՝ արդեն ընդունված պատժամիջոցների կիրառումը քննարկլու համար: Աշխատանքային խմբում նախագահում են Ֆրանսիան, Մարոկոն և Արտաքին քաղաքականության գործողությոնների եվրոպական ծառայությունը:
