News Georgia-ի փոխանցմամբ՝ Վրաստանի Աբխազիա և Հարավային Օսիա շրջանների նկատմամբ «օկուպացիա» տերմինի գործածումն արդարացված է միջազգային իրավունքի տեսանկյունից: Այս մասին այսօր տեղի ունեցած ճեպազրույցի ժամանակ հայտարարել է Վրաստանի փոխարտգործնախարար Նինո Կալանդաձեն.
«Հաագայի կոնվենցիայի համաձայն՝ օկուպացիա է անվանվում ինքնիշխան պետության տարածքում հակառակորդի զորքի գտնվելը: Ժնևյան կոնվենցիայով էլ օկուպացիա է համարվում այն, երբ, առանց ինքնիշխան պետության համաձայնության, նրա տարածքի մի մասում կամ ողջ տարածքում հայտնվում են այլ պետության զորքերը: Աբխազիայում և Ցխինվալի շրջանում ստեղծված իրավիճակը լիովին համապատասխանում է այդ չափանիշներին: Ոչ ոք չի կասկածում, որ Վրաստանի տարածքի մի մասն օկուպացված է»:
Հիշեցնենք, որ ավելի վաղ Ռուսաստանի փոխարտգործնախարար Գրիգորի Կարասինը, մեկնաբանելով մարտի 29-ին Ժնևում տեղի ունեցած անվտանգության ու կայունության ապահովման բանակցությունների արդյունքները, հայտարարել էր, որ հունիսին կայանալիք բանակցային փուլի ժամանակ քննարկվելու է Աբխազիայի և Հարավային Օսիայի նկատմամբ «օկուպացված տարածքներ» տերմինի իրավացիության հարցը:
