ՀՀՇ վարչության նախագահ Արամ Մանուկյանն այսօր Արտաշատում ՀԱԿ նախընտրական քարոզարշավի ժամանակ բավական բուռն ելույթ ունեցավ: Հավանաբար պատճառն այն էր, որ հրապարակում հավաքված բազմություն չկար:
«Ասում են` նկարահանելու ենք, հլա գնացեք Լևոնի միտինգի՞ն: Է՞ս էիք ուզում, որ երկու հոգի գան ու ասեի՞ն: Քաղաքական պայքար այսօր չկա, կա Սերժ` իր ոհմակով, Արթուրիկ։ Հայաստանը կա՛մ կործանվում է, կա՛մ ասում ենք՝ հերիք ա այս մահաբեր ընթացքին: Անդրանիկ ու Նժդեհ չկա, մենք կանք: Սրանք մորեխներ են, կուտեն, կգնան, բայց մենք կուլ չգնանք»,- ասաց Ա. Մանուկյանը:
Խոսելով այսօրվա պատգամավորների որակների մասին, նա ասաց. «ՄԱԿ-ը չեն ջոկում Միացյալ Նահանգներից, այդ մարդիկ, աննամուսները, հաստավիզները ձեզնից այսօր ձայն են խնդրում: Ժողովու՛րդ, սթափվեք, մեր երկիրը ձեռից գնում է` մարդկային, ֆիզիկական առումով, Հայաստանն այունաքամ է լինում: Մեր երկիրը կդառնա բաց դաշտ, բայց դա իրենց չի հուզում, մենակ լափեն: Ռոբերտ Քոչարյանը կերավ միլիարդները, հիմա էլ էս մեկն է նույնն անում»:
Նա խնդրեց ընտրողներին իրենց ձայնը թիվ 17 ընտրատարածքում տալ ՀԱԿ-ի կողմից առաջադրված Գագիկ Ներսիսյանին և Կոնգրեսին:
Անդրադառնալով օրեր առաջ Հանրապետականի նախընտրական քարոզարշավին Արտաշատում՝ թեկնածու Գ. Ներսիսյանն ասաց. «Սնայպերներ էին, այն սնայպերները, որոնք մարտի 1-ն էին, դուք պետք է տեսնեիք` ոնց էին բոլոր գյուղերից, անգամ Սիսիանից բերել հասցրել հանդիպմանը: Մանկավարժի սուրբ գաղափարն էլ չկա»:
Այդ օրը նաև «Սյունյաց արծիվներն» էին եկել ՀՀԿ-ի քարոզարշավին, այս առնչությամբ էլ նա ասաց. «Լավ էր՝ լեշակերներին չէին բերել: Էս բորենիները եթե տասին խժռեցին, ձեզ էլ կխժռեին, մեր առաջնորդը չթողեց»:
