Մեծ Բրիտանիայում դատարանը վճիռ է կայացրել հաքերի նկատմամբ, որը կոտրել է աբորտների գծով մասնագիտացած կլինիկաների խոշոր ցանցի կայքը և այնտեղից գողացվել 10 հազար հաճախորդների անձնական տվյալները: Ինչպես տեղեկացնում է lenta.ru-ն` հղում անելով BBC News-ին, 27-ամյա Ջեյմս Ջեֆրին, որը ենթադրաբար կապ ունի Anonymous հաքերային խմբի հետ, դատապարտվել է 2 տարի, 8 ամիս ազատազրկման:
Ջեֆրիի խոսքով` ինքը կոտրել է British Pregnancy Advisory Service-ի կայքը` ի նշան աբորտների դեմ բողոքի: Նրան խիստ մտահոգել էին իր ծանոթ երկու կանայք, որոնք դիմել էին հղիության արհեստական ընդհատման:
Հաքերն ընդունել է իր մեղքը` կլինիկաների համակարգչային տվյալների բազա ապօրինաբար մուտք գործելու համար: Դեպքը տեղի է ունեցել մարտին: Նա հայտնել է դատարանին, որ մտադիր է եղել հրապարակել գողացված տվյալները` աբորտի դիմած կանանց անունները, հեռախոսահամարները, էլեկտրոնային փոստի հասցեները: Ավելի ուշ Ջեֆրին միտքը փոխել է և սկսել իր համակարգչից ջնջել գողացված ինֆորմացիան:
Ի դեպ, BPAS կլինիկաների ցանցում տարեկան 53 հազար հղիության ընդհատում է կատարվում:
