«Ես չեմ կարծում, որ քրդական կառույցը կստեղծվի, քանի որ այն իր հետևից բերում է մի շարք խնդիրներ: Բայց հայտարարության հետևում որոշակի երևույթներ են կանգնած: Հասունանում է այն միտքը, որ Իրաքի հյուսիսային շրջաններում ստեղծվի ինչ-որ քրդական պետական անկախ կառույց, որը կլինի նախադեպ այլ քրդական միություններ ստեղծելու»,- լրագրողների հետ հանդիպմանը ասաց իրանագետ Գառնիկ Ասատրյանը:
Ըստ նրա՝ մեզ համար քրդերի հետ լավ փոխհարաբերություններ ունենալը կարևոր է, քանի որ քրդական շրջաններում կա համակրանք հայերի հանդեպ:
Բանախոսը կարծում է, որ միասնական քուրդ ժողովուրդ գոյություն չունի. «Երբ ասում ենք հայ՝ հասկանում ենք հայ, իսկ երբ ասում ենք քուրդ՝ մի քանի բան ենք հասկանում: Քուրդը հարաբերական հասկացություն է: Օրինակ՝ Թուրքիայի և Իրաքի քրդերը տարբեր են: Նրանք նույնիսկ մի լեզվով չեն կարողանում խոսել: Նրանց հարկավոր է երրորդ միջնորդ լեզուն: Այս իրավիճակը թույլ է տալիս ասել, որ նման տարածքի ստեղծումը այնքան էլ հավանական չէ»:
Համատեղ ասուլիսի ժամանակ քաղաքագետ Լևոն Շիրինյանը, խոսելով թեմայի մասին, նշեց, թե ոչ ոք չի կարող պնդել, որ այսօրվա մասնատված քրդական էթնոսը, որին հատուկ է ոչ թե համաշխարհային, այլ էթնո մշակույթը, չի սինթեզվի. «Եթե լինի արտաքին ուժի օգնություն, գործը կշարունակվի: Այստեղ Թուրքիայի համար խնդիր կա, և այն ամեն ինչ կանի որ այդ հարցը չլինի: Բայց եթե, այնուամենայնիվ, նման բան լինի, ապա դա մեզնից կախված չէ»:
Շիրինյանի խոսքերով՝ քաղաքականության մեջ ոչինչ բացառել պետք չէ, քանի որ տարիներ առաջ ոչ ոք չէր հավատա, թե Սովետական Միությունը կփլուզվի, բայց այսօր այն չկա:
