Քիչ առաջ ՀՀԿ նախագահ Սերժ Սարգսյանը Այնթապ համայնքի ընտրողների հետ հանդիպման ժամանակ շնորհակալություն հայտնեց նախորդ ընտրություններին իրենց վստահելու համար և խնդրեց այս անգամ էլ աջակցել ՀՀԿ-ին և թիվ 16 ընտրատարածքում ՀՀԿ-ի կողմից առաջադրված Մուրադ Մուրադյանին: Սերժ Սարգսյանը ընտրողներին կոչ արեց միայն խղճի մտոք գնալ ընտրության և այնպես քվեարկել, որ մայիսի 6-ից հետո չզղջան:
«Այնպես պետք է անենք, որ թշնամությունը, չկամությունը չավելանա, որպեսզի ընտրություններից հետո կարողանանք շփվել այն մարդկանց հետ, ովքեր այլ կարծիք ունեն: Մայիսի 6-ից հետո գալու է 7, 8 ,9»,- ասաց նախագահը՝ հավելելով, թե իրենց չի հաջողվել իրականացնել այն, ինչ ցանկանում են, բայց հավաստիացրեց, որ շատ ջանք են թափել:
«Մենք չունենք բնական ռեսուրսներ, որպեսզի կարողանանք մեր աշխատանքով պահել մեր հայրենիքը, գյուղը, բանակը: Պետք է միայն շատ աշխատենք: Գիտեմ, որ բազմաթիվ խնդիրներ կան: Կառավարությունը ավելի ակտիվ է սկսելու աշխատել»,- նշեց Սերժ Սարգսյանը` հավելելով, որ 2008 թվականի համաշխարհային տնտեսական ճգնաժամը լուրջ հարված հասցրեց, սակայն երկիրը կարողացավ հաղթահարել այն և որևէ սոցիալական ծրագիր չկրճատել:
Նշենք, որ Սերժ Սարգսյանը այցելեց Այնթապ համայնքում նոր կառուցվող մանկապարտեզ և ծանոթացավ շինաշխատանքների ընթացքին:
