Հայաստանում օրեցօր տարածվում են օդի աղտոտվածության պատճառով առաջացող հիվանդությունները: «Եթե դիտարկենք հանրապետությունում ընդհանուր հիվանդացությունը, ապա աճն առկա է բոլոր հիվանդությունների պարագայում: Սակայն թոքերի քաղցկեղը, ինֆարկտը, բրոնխիտը, ասթման, ալերգիկ հիվանդությունները, նյարդային, իմունային, սիրտանոթային համակարգերի և շնչուղիների ախտահարումը մեզանում մեծ աճ են արձանագրում»,- «Առաջին լրատվական»-ին հայտնեց բժիշկ-էկոլոգ Սարհատ Գաբրիելյանը:
Բրոնխիալ ասթմայի տարածվածության վերաբերյալ անցկացրած տարբեր հետազոտությունների տվյալներով` վերջին 30 տարիների ընթացքում կրկնակի ավելացել է հենց այս հիվանդությունը։ Ներկայումս բնակչության 4-8 տոկոսը տառապում է այդ հիվանդությամբ։ Երեխաների շրջանում այդ թիվը հասնում է 5-10 տոկոսի, իսկ մեծահասակների շրջանում՝ 5 տոկոսի սահմաններում է։ Ալերգոլոգների և էկոլոգների խոսքով` Հայաստանում ալերգիաներն ինֆեկցիոն հիվանդություններից հետո երկրորդ տեղն են զբաղեցնում. պատճառը աղտոտված օդը, ջուրն ու անորակ սննդամթերքն են:
Ալերգոլոգ, իմունոլոգ և ինֆեկցիոնիստ Կարինե Սաֆարյանը նկատում է նաև դիսբակտերիոզ (աղիքային հիվանդություն) հիվանդության աճ: Իսկ վերջին շրջանում բժիշկները արձանագրում են հատկապես նորագոյացությունների և աննորմալ ծնունդների աճ:
Նշենք, որ, համաձայն Եվրամիության Clean Air for Europe կազմակերպության անցկացրած ընդարձակ հետազոտության, միկրոմասնիկների և աղտոտված օդի պատճառով սրված հիվանդությունները ԵՄ տարածքում տարեկան ազդում են շուրջ 200—300 հազար մարդու կյանքի տևողության վրա։
