«Այն կուսակցությունները, որոնք ստորագրել են հայտարարության տակ, իրականում լրիվ տարբեր են իրարից՝ և՛ իրենց գաղափարախոսությամբ, և՛ կատարած աշխատանքով։ Գուցե դա քայլ է՝ ուղղված ՀՀԿ-ի դե՞մ»,-«Առաջին լրատվական»-ի հետ զրույցում ասաց իրավապաշտպան Միքայել Դանիելյանն այն հայտարարության մասին, որին միացել են չորս կուսակցություններ։ Դրանք են Դաշնակցությունը, «Ժառանգություն»ը , ԲՀԿ-ն և ՀԱԿ-ը։ Նրանք միասին պայքարելու են ընտրությունների ժամանակ ընտրակեղծիքների դեմ։
Իրավապաշտպանի կարծիքով՝ ինչքանով է դա արդարացված կամ չարդարացված, կերևա ոչ թե ստորագրված փաստաթղթով, այլ գործով. «Ընդհանրապես, պետք է փորձ անել գոնե մեկ անգամ ընտրություններն անցկացնել նորմալ և քաղաքակիրթ, բայց թե ինչքանով կստացվի՝ ես չգիտեմ, որովհետև և՛ Դաշնակցությունը, և՛ ԲՀԿ-ն անցյալ ընտրությունների ժամանակ մասնակցել են ընտրակեղծիքներին և դժվար թե փոխվեն, նրանք արդեն սովոր են դրան»։
Այն հարցին, թե նման համագործակցության դեպքում տարաձայնություններ կլինե՞ն մյուս կուսակցությունների հետ, Միքայել Դանիելյանը պատասխանեց, որ եթե նույն ընտրական տեղամասում տարբեր կուսակցությունների մարդիկ են քվեարկվում և ուզում են պատգամավոր դառնալ, միանշանակ՝ տարաձայնություններն անխուսափելի են։
