ԱՄՆ նախագահի հնարավոր թեկնածու հանրապետական Նյութ Գինգրիչի հետազոտական կենտրոնը ապրիլի 5-ին իրեն սնանկ է հայտարարել,- հաղորդում է Bloomberg-ը: Առողջապահության բնագավառում վերափոխման կենտրոնը (Center for Health Transformation) զբաղվում էր բարեփոխումների մշակմամբ, որոնք ուղղվում էին ամերիկացիների առողջության պաշտպանության համակարգի թարմացմանը:
Հետազոտական կենտրոնը ղեկավարող Gingrich Group LLC-ը սնանկության մասին հայտարարության մեջ նշում է, որ այն իր հաշվին ունի 100 հազար դոլար և 10 մլն դոլարի պարտք: Գինգրիչը հայտարարել է, որ շատ է մտահոգված իր կենտրոնի սնանկացմամբ, և ափսոիսանք է հայտնել, որ որոշ մարդիկ մնացել են առանց աշխատանքի:
Ներկայացուցիչների պալատի նախկին խոսակ Նյութ Գինգրիչը հետազոտական կենտրոնը բացել էր 2003 թ.: Կազմակերպությանն անդամակցության արժեքը կազմում էր տարեկան մինչև 200 հազար դոլար: Այն հայտնի է դարձել Օբամայի կողմից առողջապահության ոլորտում իրականացվող բարեփոխումերի սուր քննադատությամբ:
2011 թ. նոյեմբերին Գինգրիչը հայտարարել էր, որ The Gingrich Group-ը և Center for Health Transformation-ը 2001-2010 թթ. ընթացքում հավաքել են 55 մլն դոլար հանգանակություն:
Հետազոտական կենտրոնն իր հաճախորդների ցուցակը չի հրապարակել, սակայն որոշ ընկերություններ չեն թաքցնում կազմակերպության հետ իրենց համագործակցությունը: Դրանց թվում են կոսմետիկ և բժշկական ապրանքներ արտադրող Johnson & Johnson ընկերությունը, Blue Cross & Blue Shield Association ապահովագրական ընկերությունը, AstraZeneca դեղագործական ընկերությունը և ԱՄՆ բժշկական ապահովագրության ոլորտում առաջատար Wellpoint-ը:
Կենտրոնի ներկայացուցիչը պատմել է, որ հաճախորդների թիվը կտրուկ նվազել է 2011 թ. մայիսից այն բանից հետո, երբ Գինգրիչը դադարեց ակտիվորեն զբաղվել Կենտրոնի աշխատանքներով և իր ուշադրությունը կենտրոնացրեց նախագահական ընտրարշավի վրա:
Որոշ քաղաքական և հասարակական գործիչներ, այդ թվում՝ Գինգրիչի մրցակիցներ Միթ Ռոմնին և Ռիք Փերին, կարծում են, որ Գինգրիչը զբաղվել է խոշոր ընկերությունների շահերի լոբբինգով: Գինգրիչը սակայն նշել է, որ ինքը պարզապես խորհրդական է և գրանցված չէ որպես լոբբիստ:
