Այսօր լրագրողների հետ հանդիպմանը սեքսապաթոլոգ Վրեժ Շահրամանյանը անդրադարձավ սեռական դաստիարակության խնդիրներին և, մասնավորապես, նշեց, որ դա զրույց չէ սեքսի մասին, այլ դաստիարակություն է, որը յուրաքանչյուր մարդ պետք է ստանա:
Նրա խոսքերով՝ պետք է վերջ տալ երեխաներին արագիլների և կաղամբի մասին հեքիաթներ պատմելուն. եթե երեխան հարցնում է, թե իրեն ով է բերել, ուրեմն պատրաստ է լսել ճշմարտությունը. «Եթե խաբում եք երեխային, նա ճշմարտությունը իմանում է այլ աղբյուրներից, ընկերներից, որոնք հաճախ դա ներկայացնում են գռեհիկ ձևով: Այս դեպքերում երեխայի և ծնողի միջև անդունդ է ստեղծվում, և երեխան դադարում է վստահել ծնողին»:
Ըստ նրա՝ սեռական դաստիարակության պակասն է, որ 2004 թվականից սկսած, Google trance ծառայության կողմից անցկացվող վիճակագրության համաձայն, ՀՀ-ում ամենաորոնվող բառը «պոռնոն» է:
Ասուլիսի մյուս բանախոս՝ հոգեբան Խաչիկ Գալստյանը նշեց, որ ծնողները խուսափում են երեխաներին բացատրել մի շարք սեռական երևույթներ. «Մեր իրականության մեջ սեռական խնդիրները թաքնված են, ընտանիքը այդ կարգի բառերը համարում է գռեհիկ և դրանք հանում ամենօրյա բառապաշարից»:
Այս բացթողումը, ըստ հոգեբանի, գալիս է նաև դպրոցից, որտեղ սեռական դաստիարակությանը վերաբերող որևէ դասընթաց չկա: Հոգեբանի կարծիքով՝ եթե երեխան մտնում է պոռնո կայքեր, ապա ծնողները պետք է ոչ թե բարկանան, այլ փորձեն հասկանալ, թե ինչու է երեխան այդպես վարվում. «Երեխային հանգիստ բացատրեք, որ դա սխալ է, ինքներդ պատասխանեք նրանց հուզող հարցերին»:
Խոսելով ՀՀ-ում մարմնավաճառության և կոմերցիոն սեքսի մասին՝ սեքսապաթոլոգը հայտնեց, որ, պաշտոնական տվյալներով, ՀՀ-ում մարմնավաճառների թիվը հասնում է 400-ի, որից մոտ 300-ը վարակված են ինչ-որ սեռական հիվանդությամբ. «Տղամարդիկ դիմում են մարմնավաճառներին, որովհետև նրանք անկողնում չեն ստանում այն, ինչը դրսում են ստանում»:
