«ԴԱՀԿ պետ Միհրան Պողոսյանը ՀՀ բարձրաստիճան պաշտոնյաների շրջանում հայտնի է իր արտոնյալ անկախ պահվածքով»,- գրում է «Հրապարակ»-ը:
«Արդարադատության նախարարությունում նա իր ազդեցությամբ երկրորդ, եթե ոչ առաջին մարդն է: Պատահական չէ, որ նախարար Հրայր Թովմասյանը նշանակվելու պահից որոշակի զգուշավորությամբ է վերաբերվել Միհրան Պողոսյանին: Դրա հիմքը նաև վերհուշն է նախկին արդարադատության նախարար Գևորգ Դանիելյանի մասին, որը պաշտոնանկ արվեց Միհրան Պողոսյանին գրավոր նկատողություն չտալու պատճառով:
Վերջերս մերձիշխանական վերնախավի կերուխումերից մեկի ժամանակ, որին ներկա է եղել նաև ԴԱՀԿ պետը, Հրայր Թովմասյանը խոստովանել է, որ իր պաշտոնը ստանձնելիս ամենաշատը Միհրանից է զգուշացել: Հետագայում, սակայն, համոզվել է, որ իր մտավախությունն իզուր էր, և համատեղ աշխատանքը եղբայրացրել է նրանց: Հրայր Թովմասյանը համոզվել է, որ ԴԱՀԿ պետը գործի նվիրյալ է և իր ամենամոտ մարդկանցից է դարձել»,- ապա թերթը հավելում է.
«Երկու բարձրաստիճան գործընկերների ջերմ հարաբերությունների գործնական ապացույցն այն է, որ նոտարների որակավորման վերջին քննության արդյունքներով` նախարարը պետական նոտար դարձրեց Միհրան Պողոսյանի զարմուհի Հայկուհի Հարությունյանին, որը նաև ԱԱԾ պետի տեղակալ Գրիգոր Հարությունյանի դուստրն է»:
