Երբ աշխարհի շատ երկրներում նշվում է Ծիծաղի օրը, գերմանական ԶԼՄ-ները, որպես ապրիլմեկյան կատակ, ավանդաբար հրատարակում են անհեթեթ նյութեր` նպատակ ունենալով ուրախացնել իրենց ընթերցողներին:
Այս տարի ևս գերմանական թերթերը Ծիծաղի օրը մի շարք կատակներ են հրատարակել` միաժամանակ զգուշացնելով, որ պետք չէ արժանահավատություն ընծայել դրանց ճշմարտացիությանը:
Frankfurter Allgemeine Zeitung –ի ապրիլմեկյան կատակը տեղադրվել էր տիտղոսաթերթին: Դրանում մասնավորապես ասվում էր, որ ՄԱԿ-ի գլխավոր ասամբլեայի անդամները միաձայն քվեարկել են, որ Ծիր Կաթինը վերանվանվի Հելմուտ Շմիդտ` ի պատիվ ԳԴՀ-ի հինգերորդ կանցլերի»:
Թերթը գրել էր նաև, որ իտալացի գիտնական Գալիլեո Գալիլեյի ժառանգները Վատիկանին դատի են տվել այն բանի համար, որ ինկվիզիցիան 1633թ. նրան մեղավոր էր ճանաչել Երկրի պտույտի մասին փաստելու պատճառով:
Բացի այդ` նորություն էին հայտնել, թե իբր ԱՄՆ Կալիֆոռնիա նահանգի նախկին նահանգապետ Առնոլդ Շվարցենեգերը կմասնակցի ԱՄՆ նախագահական քարոզարշավին:
Մյուս լուրը, որ ժպիտ է պարգևել շատ գերմանացիների , այն է, որ Գերմանիայի նոր նախագահ Իոահիմ Գաուկը կամուսնանա ու մեղրամսին ուղևորության կմեկնի հատուկ գնացքով, որտեղ տեղակայված կլինի ջակուզի:
Լեգենդներից մեկի համաձայն` Ծիծաղի օրը առաջին անգամ նշվել է Գերմանիայում 1530թ.:
