ԱՄՆ-ը Աֆղանստանի իշխանություններից պահանջում է պատասխանատվության ենթարկել Կապիսի նախկին նահանգապետին, որը կասկածվում է ամերիկացիների սպանությանը մասնակցություն ունենալու մեջ:
Ինչպես հաղորդում է The Wall Street Journal-ը, ամերիկացիների վարած հետաքննության ընթացքում պարզվել է, որ նախկին նահանգապետը՝ Ղուլամ Կավիս Աբու Բաքրը, 2009թ. մայիսին մահապարտի հարձակում է կազմակերպել, ինչի հետևանքով զոհվել են 2 ամերիկացի զինծառայողներ, այդ թվում՝ փոխգնդապետ Մարկ Ստրատոնը:
Բացի այդ, թերթը տեղեկացնում է, որ նախկին մարզպետը կասկածվում է ԱՄՆ-ի, Ֆրանսիայի և Մեծ Բրիտանիայի դեսպաններին սպանելու նպատակով դավադրություն կազմակերպելու մեջ:
Ավելի վաղ ԱՄՆ-ն արդեն Աբու Բաքրին մեղադրել էր տարբեր հանցագործությունների, այդ թվում՝ կոռուպցիայի և դրամաշորթության մեջ:
Մինչ այժմ Աֆղանստանի նախագահ Համիդ Քարզայի վարչակազմը հրաժարվում է պատասխանատվության ենթարկել Աբու Բաքրին՝ պատճառաբանելով, թե նրա դեմ բավարար փաստեր չկան: Ինքը՝ նախկին նահանգապետը, հերքում է իր դեմ եղած բոլոր մեղադրանքները:
Քարզայն Աբու Բաքրին մարզպետ էր նշանակել 2007թ., իսկ 3 տարի անց ստիպված էր նրան հեռացնել: Պարբերականը գրում է, որ, այնուամենայնիվ, նախկին մարզպետը պահպանում է իր ազդեցությունը: Նախկինում նա եղել է մոջահիդների հրամանատարը, որոնք կապ են ունեցել «Հեզբ Ալ- Իսլամի» խմբավորման հետ:
Նախկին նահանգապետի դեմ նոր մեղադրանքները հնչում են Քաբուլի և Վաշինգտոնի միջև սրվող հարաբերությունների ֆոնին:
Հիշեցնենք, որ վերջերս աֆղանցիների շրջանում բողոքի մեծ ալիք էր բարձրացրել ամերիկացի զինվորների կողմից Ղուրանի օրինակներն այրելու հանգամանքը: Իսկ մարտի 11-ին ամերիկացի սերժանտ Ռոբերտ Բեյլսը դուրս գալով ռազմաբազայից՝ սպանել է 17 խաղաղ աֆղան բնակիչների:
