Թուրքիայի բնակիչների մեծ մասը կողմ է սեփական ատոմային զենք ստեղծելուն` Իրանի միջուկային սպառնալիքից պաշտպանվելու համար: Այս մասին վկայում են Ստամբուլում գտնվող Տնտեսության և արտաքին քաղաքականության ուսումնասիրության կենտրոնի կողմից իրականացված հարցման արդյունքները։
Հարցման մասնակիցների 53,9 %-ի կարծիքով՝ սեփական ատոմային զենքն ավելի արդյունավետ կպաշտպանի իրանական միջուկային սպառնալիքից, քան ՆԱՏՕ-ի անդամ-երկրների օգնությունը։ Այս մասին հաղորդում է ИТАР-ТАСС-ը:
Միաժամանակ 35 %-ը կարծում է, որ ոչ մի պարագայում պետք չէ սեփական միջուկային զենք ունենալ: Միայն 8 %-ն է վստահ, որ ՆԱՏՕ-ի անդամ լինելը ստեղծում է անվտանգության վստահելի երաշխիքներ:
Հարցմանը մասնակցել է Թուրքիայի 18 տարեկանից բարձր 1.5 հազար բնակիչ` տարբեր մարզերից:
Նշենք, որ Թուրքիայի վարչապետ Էրդողանը, ով այսօր գտնվում է Իրանում, սատարել է Իրանի սեփական միջուկային ծրագրի մշակմանը: Lenta.ru-ի հաղորդմամբ՝ Թեհրանում Իրանի փոխնախագահ Մուհամմադ Ռեզա Ռախիմի հետ հանդիպումից հետո թուրքական կառավարության ղեկավարը հայտարարել է. «Ոչ ոք իրավունք չունի ուժ կիրառել մի պետության դեմ, ում միջուկային արտադրությունը կիրառվում է բացառապես խաղաղ նպատակներով»:
Էրդողանի խոսքերով՝ աշխարհի բոլոր խելամիտ մարդիկ դեմ են ատոմի էներգիան ռազմական նպատակներով օգտագործելուն, սակայն սատարում են դրա խաղաղ նպատակներով օգտագործմանը:
Ավելի վաղ Թուրքիան հայտարարել էր, որ չի միանա Իրանի դեմ ԱՄՆ-ի և ԵՄ երկրների սահմանած պատժամիջոցներին:
