Ադրբեջանական APA լրատվական գործակալության փոխանցմամբ՝ ԵԱՀԿ Մինսկի խմբի նախկին համանախագահ, Ադրբեջանում ԱՄՆ նախկին դեսպան Մեթյու Բրայզան լրագրողների հետ զրույցում անդրադարձել է ղարաբաղյան հակամարտության կարգավորմանը.
«Հայաստանն ու Ադրբեջանը դեռ պատրաստ չեն լուծել ղարաբաղյան հակամարտությունը: Սակայն այդ հարցը կլուծվի: Դրա համար երկու երկրների ղեկավարների սեղանին դրված է շրջանակային համաձայնագիր: Խնդրի լուծման համար անհրաժեշտ է 4, 5 կամ 6 կարևոր պայման: Դրա համար երկու երկրների նախագահները պետք է իրենց վրա վերցնեն հակամարտության կարգավորումը և վստահեն միմյանց:
Դա քաղաքական մեծ ռիսկ է, քանի որ Հայաստանի ու Ադրբեջանի հասարակությունները պատրաստ չեն այդ հարցի կարգավորման վերաբերյալ որոշման ընդունմանը: Անհրաժեշտ է, որպեսզի երկու հասարակությունները փոխեն իրենց տեսակետները կամ էլ նախագահներն իրենց վրա վերցնեն քաղաքական մեծ ռիսկ»:
