ՀԱԿ նախընտրական ծրագիրը կհրապարակվի մարտի 30-ին կայանալիք հանրահավաքի ժամանակ: Քաղաքական ու միջազգային հետազոտությունների հայկական կենտրոնի՝ այսօր կազմակերպած քաղաքական քննարկման ժամանակ այս մասին ասաց ՀԱԿ ներկայացուցիչ Վլադիմիր Կարապետյանը:
Անդրադառնալով ցուցակների կազմման թեմային՝ նա նշեց, որ ՀԱԿ-ի դրությունը ցուցակ կազմելիս, մյուս քաղաքական ուժերի համեմատ, բավական բարդ է եղել: «Բայց մենք պատվով դուրս եկանք այս մարտահրավերից: Ի վերջո, համաձայնություն ձեռք բերվեց: ՀԱԿ-ը շարունակում է համախմբված լինել, շարժվել դեպի նպատակների իրականացում: Ընդ որում, մեր ցուցակում հանրության համար որևէ անակնկալ չկա: Դրանում ներառված են մարդիկ, ովքեր վերջին չորս տարիներին անհավասար պայքար են մղել իշխանությունների դեմ»,- նշեց նա:
Կարապետյանի խոսքով՝ գրեթե բոլոր ընտրատարածքներում մեծամասնականով առաջադրված թեկնածուների միջոցով աշխատելու են վերահսկել ընտրական գործընթացները:
Ամփոփելով՝ նա նկատեց, որ ժողովուրդն այսօր ավելի վատ է ապրում, արտագաղթի չափերը գնալով մեծանում են: «Բայց պետք է անել ամեն ինչ՝ արթնացնելու ժողովրդին և հասկացնելու, որ նրա քվեն իրավիճակը փոխելու մեծ ուժ ունի: Եթե ձախողումները բոլոր ուղղություններով են, եթե մարտի 1-ի մարդասպաններն ազատության մեջ են, ուրեմն իշխանություններից ազատվելու այլընտանք չկա, քան համախմբվելը»,- նշեց ՀԱԿ անդամը:
