Ֆրանսիայի նախագահ Նիկոլա Սարկոզին մարտի 27-ի երեկոյան հայտարարել է, որ իր երկիրը կխլացնի այն հեռուստաալիքների ազդանշանները, որոնք իրենց եթերով կցուցադրեն Թուլուզում մարդկանց սպանությունները: Այս մասին հաղորդում է Agence France-Presse գործակալությունը:
Միաժամանակ նա շնորհակալություն է հայտնել «Ալ-Ջազիրա» հեռուստաընկերությանը, որը հրաժարվել է ցուցադրել Մուհամմեդ Մերայի կողմից մոնտաժված փոքրիկ ֆիլմը` երեք զինվորականների, ուսուցչի և երեք երեխաների սպանության դրվագներով:
Այդ տեսանյութը ստացել է քաթարյան հեռուստաալիքի ֆրանսիական գրասենյակը: Ոստիկանությունը գտնում է, որ այդ տեսագրությունն ուղարկել է ահաբեկչի համախոհը: «Ալ-Ջազիրա»–ի խմբագրությունը հաստատել է, որ իր մոտ նման տեսագրություն կա, բայց հրաժարվում է այն եթեր հեռարձակել՝ բարոյական սկզբունքներից ելնելով:
Դեռ հայտնի չէ, թե արդյոք այլ հեռուստաընկերությունների այդ տեսագրությունն ուղարկվել է, թե՝ ոչ:
Ինչպես ավելի վաղ հայտնել էին, Մուհամմեդ Մերան սպանվել է մարտի 22-ին` նրան ձերբակալելու համար նախատեսված ոստիկանության հատուկ օպերացիայի ժամանակ: Մահվանից քիչ առաջ ոստիկանների հետ խոսակցության ժամանակ նա հայտնել է, որ իր կատարած ահաբեկչությունը վրեժ է՝ Աֆղանստանում ֆրանսիական ներկայության և Իսրայելի կողմից Գազայի անընդհատ ռմբակոծման համար:
