«Այսօր Թատրոնի միջազգային օրն է, և ամբողջ աշխարհը տոնում է այն: Մենք ևս տոնում ենք. մարտի 27-ին տեղի կունենա «Արտավազդ» ամենամյա մրցանակաբաշխությունը, որտեղ 11 անվանակարգերում ներկայացված կլինեն լավագույն թատերական գործերը»,- այս մասին լրագրողների հետ հանդիպմանն ասաց Թատերական գործիչների միության նախագահ Հակոբ Ղազանչյանը՝ հավելելով, որ, այնուամենայնիվ, թատրոնում առկա խնդիրները շատ-շատ են:
Նա նշեց` լավ կլիներ, եթե հայ հասարակությունը ավելի շատ տեսներ և ճանաչեր անվանի հայ թատերական գործիչներին, և ավելի քիչ երևային սերիալային միջակությունները. «Ես շատ կցանկանայի, որ հասարակությունը թատրոնի՝ իսկապես տաղանդավոր գործիչներին ավելի շատ տեսներ հեռուստաէկրաններին, սակայն նրանց մեղքը միայն այն է, որ աշխատում են թատրոնում և քիչ են երևում եթերում: Գալիս է նոր, տաղանդավոր սերունդ, ովքեր թատրոնը դարձնում են իրենց ապրելու նպատակը: Բավական կիրթ և կողմնորոշված երիտասարդներ կան, որոնց պետք է տեղ տալ: Հենց սա է թատրոնի ամենամեծ խնդիրը»:
Հ. Ղազանչյանի կարծիքով՝ այսօր ունենք իրոք տաղանդավոր երիտասարդներ, սակայն նրանք աշխատում են միայն եթերի համար՝ անտեսելով թատրոնը. «Ցավոք, նրանք չեն հասկանում, որ վաղ թե ուշ եթերը կհոգնի նրանցից, և կկանգնեն «կոտրած տաշտակի» առջև»:
Ըստ Թատերական գործիչների միության նախագահի՝ թատրոնի համար լուրջ խնդիր է նաև այն, որ այսօր չունենք թատերագետներ. «Ամեն մեկը դուրս է գալիս՝ ասում, թե իբր թատերագետ է: Մինչդեռ թատերագետը պետք է լուրջ վերլուծության ենթարկի ներկայացումը, նա պետք է խելացի լինի: Իսկ այսօր կարծես թե տիրում է վախի մթնոլորտ»:
Հաջորդ խնդիրը դրամատուրգիայի դպրոց չունենալն է. «Ունենք լավ, տաղանդավոր դրամատուրգներ, բայց դրամատուրգիայի տեսակը, որպես այդպիսին, չի կայանում»:
Որպես ամփոփում՝ Ղազանչյանը հավելեց, որ այժմ ավելի շատ են թատրոն հաճախում. «Սերիալները ևս մարդկանց կարող են բերել թատրոն: Այդպիսի մի դեպք գրանցվել է, երբ Արթուր Կարապետյանի («Աննա» հեռուստասերիալում Գնունու դերակատարն է) ներկայացումներին նույնիսկ հերթեր էին գոյացել»:
