Չգիտեմ Շուշան Պետրոսյանի առաջադրմանն ինչպես վերաբերվել, «Առաջին լրատվական»-ի հետ զրույցում նման տեսակետ հայտնեց երգահան, երգչուհի Լիլիթ Պիպոյանը`խոսելով մտավորականների կուսակցությունների նախընտրական ցուցակներում ընդգրկվելու շուրջ:
Նա կարծում է, որ Շուշան Պետրոսյանը շատ զբաղված է ելույթներով, արվեստագետ է և ինչքանով ժամանակ և ուժ կունենա ԱԺ-ում ինչ-որ բան անելու՝ չի պատկերացնում: «Եթե ինքն ասել է` այո, գուցե կարողանա ինչ-որ բան անել մեր ասպարեզի համար: Եթե այդ ձգտումն ունի: Ինձ համար շահեկան է, որ լինի մի մարդ, ով կբարձրացնի ԱԺ-ում մեր խնդիրները, բայց ինչքանով Շուշանը դա կկարողանա անել՝ չգիտեմ»,- մեկնաբանեց երգահանը:
Ըստ Լ. Պիպոյանի` մտավորականները պետք է ունենան իրենց դեսպանը խորհրդարանում: Նա տեղեկացրեց, որ վերջերս վարչապետը հրավիրել էր մտավորականներին իր հետ հանդիպման, նախընտրական ծրագրում ինչ-որ հարցեր ընդգրկելու, խնդիրները հասկանալու նպատակով: «Չեմ կարծում, որ դա զուտ ձևական բնույթ էր կրում, երևի կարևորում են մտավորականությանը և նրա խնդիրները: Կարելի է նաև հետևություն անել, որ երևի թե չեն կարևորում, որ մշակութային արժանի գործիչների չեն ընդգրկում նախընտրական ցուցակների մեջ, բայց այդ դեպքում ինչո՞ւ են հրավիրում քննարկումների»,- նկատեց Լիլիթ Պիպոյանը` հավելելով, որ ԱԺ-ում պետք է լինեն պրոֆեսիոնալներ, իրավաբաններ, որոնք լավատեղյակ են իրավունքին և օրենքներին: Երգահանի կարծիքով` նույնիսկ մտավորականության ներկայացուցիչը ԱԺ-ում պետք է նաև համապատասխան իրավաբանական կրթություն ունենա, որովհետև ԱԺ-ում պետք է հայտնվեն մասնագիտական ունակություններով մարդիկ:
