ԱՄՆ–ն ամբողջովին կիսում է Ռուսաստանի դիրքորոշումն այն հարցում, որ ՄԱԿ-ի հատուկ պատվիրակի առաքելությունը Սիրիայում պետք է սատարվի, սակայն չի հրաժարվում տարածաշրջան մարդասիրական օգնություն ուղարկելու ուղիներ որոնելուց: Այս մասին հաղորդել է Պետդեպարտամենտի պաշտոնական ներկայացուցիչ Վիկտորյա Նուլանդը:
«ՌԴ և ԱՄՆ նախագահները Սեուլի հանդիպման ժամանակ Սիրիայի խնդիրն ամբողջությամբ քննարկել են: Սակայն մենք սկսում ենք ուղիներ որոնել, թե ինչպես կարող ենք սիրիական ընդդիմությանը ոչ ռազմական օգնություն ցուցաբերել: Ի նկատի ունենք կապի սարքավորումներ, բժշկական բեռներ և այլն»,- ասել է Նուլանդը երկուշաբթի օրը՝ Պետդեպարտամենտում ճեպազրույցի ժամանակ։ Այս մասին գրում է РИА Новости-ն:
Նրա խոսքերով՝ ԱՄՆ–ը մտադիր է գործընկերներին տեղեկացնել սիրիական խնդրի լուծմանը վերաբերող հետագա բոլոր քայլերի մասին` կապված մարդասիրական օգնության մատակարարման հետ:
«Մենք քննարկել ենք միջազգային համագործակցության հարցեր, խոսել ենք մի շարք առավել պրոբլեմատիկ հարցերի շուրջ, ներառյալ՝ Սիրիան: Երեկ ես հանդիպել եմ ՄԱԿ-ի գլխավոր քարտուղարի պատվիրակ Քոֆի Անանի հետ, մենք ԱՄՆ նախագահի հետ համակարծիք ենք Անանի առաքելության վերաբերյալ»,– լրագրողներին ասել է Դմիտրի Մեդվեդևը:
Ռուսաստանի նախագահը նշել է, որ անհրաժեշտ է գործել այնպես, որ մեծ խնդիրներ չստեղծվեն, և աշխատել անել այնպես, որ Սիրիայում գոյություն ունեցող քաղաքացիական պատերազմի վտանգը չիրականանա, իսկ Անանի առաքելությունն ավարտվի լիակատար երկխոսության զարգացմամբ:
