Ղազախստանի նախագահ Նուրսուլթան Նազարբաևը հայտարարել է ԱՄՆ նախագահ Բարաք Օբամայի հակամիջուկային ռազմավարությանն աջակցելու մասին, Կորեայում միջուկային անվտանգության հարցերով գագաթնաժողովին Նազարբաևը, դիմելով Օբամային, հայտարարել է. «Ես ամբողջովին սատարում եմ ձեր կոչերն՝ ուղղված բոլոր ազգերին և ժողովուրդներին՝ պայքարելու առանց միջուկի աշխարհ ունենալու համար»: Այս մասին հայտնում է CA-News–ն։
Նա նաև նշել է, որ աջակցում է Օբամայի հակամիջուկային ռազմավարությանը, որի համաձայն՝ նրանք, ովքեր միացել են չտարածման համաձայնագրին, չպետք է ռազմական գործողություններում կիրառեն միջուկային զենքը:
«Դա ոգեշնչում է բոլորին»,- ասել է Նազարբաևը, նշելով, որ Ղազախստանն այս առումով շատ բան է արել: Մասնավորապես՝ փակել է Սեմիպալատինսկում խոշորագույն ռազմական միջուկային փորձարարական կենտրոնը, հրաժարվել է միջուկային զինանոցից:
Երկրի ղեկավարը նաև ընդգծել է, որ ԱՄՆ–ն ու Ռուսաստանը համատեղ հսկայական աշխատանք են ծավալել միջուկային ենթակառուցվածքների ոչնչացման ուղղությամբ, ինչը շատ կարևոր է ղազախստանցիների համար, ովքեր տուժել են միջուկային փորձարկումներից:
«Դրա շնորհիվ մենք ձեռք ենք բերել ռազմավարական գործընկերություն: ԱՄՆ–ը Ղազախստանում 20 միլիարդ դոլար է ներդրել: Ընդհանուր առմամբ դա Կենտրոնական Ասիայում արված ներդրումների 80 %-ն է»,- ասել է Նազարբաևը:
«Մենք հույս ունենք, որ մեր երկրների միջև տնտեսական և քաղաքական համագործակցությունը կխորանա»,- ավելացրել է նա:
Հիշեցնենք, որ Միջուկային անվտանգության գագաթնաժողովը տեղի է ունենում Սեուլում՝ մարտի 26-27-ը:
